Sekretáriu Estadu Juventude no Desportu (SEJD), Nélio Isaac Sarmento. Imajen/António Gonçalves

DILI, 10 jullu 2019 (TATOLI)—Enkontru Konsellu Ministru (KM), kuarta ohin, aprova kántigu ho lian portugés ho títulu “Unidos Somos Um” sai múzika espesiál ba jogu desportiva Komunidade Nasaun Ko’alia Lian Portugés (CPLP-sigla portugés) ba dala XII.

“Múzika ‘Unidos Somos Um’ ne’e katak ita hotu-hotu tantu hosi Amérika Latina, Áfrika ka ASEAN ne’e ita hotu-hotu ida de’it iha língua no kultura liliu ida de’it iha nasaun ho identidade luzofónia,” tenik Sekretáriu Estadu Juventude no Desportu, Nélio Isaac Sarmento, ohin iha Palásiu Governu, Dili.

Nélio dehan, múzika ho títulu “Unidos Somos Um” ne’e hananu hosi artista timoroan, Maria Vitória ‘Marvi’ no Gerson Oliveira ho nia kompozitór artista seniór, Anito Matos. “La kle’ur tan múzika ne’e públiku sei akompaña tanba Konsellu Ministru aprova ona,” katak nia.

Aleinde ne’e, governante ne’e haklaken KM mós aprova logo desportiva CPLP ba dala XII iha Timor-Leste. Governu liuhosi SEJD hahú halo preparasaun atu TL sai uma na’in ba jogu desportiva ba dala XII iha tinan 2020 ne’ebé sei hala’o iha loron 14 to’o 24 jullu. Jogu desportiva ne’e sei partisipa hosi nasaun membru CPLP hamutuk ualu.

Jornalista: Florencio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here