DILI, 09 jullu 2019 (TATOLI)-Ministru Negósiu Estranjeiru no Kooperasaun, Dionísio Babo Soares, hala’o enkontru bilaterál ho ninia omólogu, Ministru Negósiu Estranjeiru Singapura, Vivian Balakrishan, iha Ministériu Negósiu Estranjeiru Singapura.
Informasaun ne’ebé Ajénsia TATOLI asesu husi Gabinete MNEK, ohin, katak, iha enkontru ne’e, membru governu na’in rua husi nasaun rua ne’e ko’alia kona-ba asuntu kooperasaun bilaterál ne’ebé nasaun rua estabelese ona, liuliu iha área dezenvolvimentu kapitál umanu, aleinde esplora mós área potensiál sira seluk hanesan; saúde, negósiu no ekonomia ba kooperasaun iha futuru.
Asuntu ASEAN mós sai tópiku importante iha enkontru ne’e no Ministru Vivian anúnsiu katak, Governu Singapura apoiu misaun avaliasaun ne’ebé sei ba Timor-Leste iha inísiu Setembru tinan ida ne’e, hodi avalia viabilidade aspetu polítiku no seguransa Timor-Leste nian, no rezultadu husi avaliasaun ne’e maka sei sai referénsia ba lider másimu membru ASEAN sira hodi pronúnsia desizaun ruma ba Timor-Leste nia adezaun ba ASEAN.
Iha parte seluk, Ministru Babo Soares apresia inisiativa misaun ne’e no Timor-Leste prontu atu kolabora ho ekipa avaliasaun hodi fornese dadus no informasaun adekuada husi kada liña Ministeriál, no halo esforsu másimu atu prienxe rekizitu mínimu hodi sai membru ba família ASEAN.
Jornalista : Eugénio Pereira
Editór : Francisco Simões
