Sentru Saúde Formosa, Dili

DILI, 9 jullu 2019 ( TATOLI)—Sistema rejistu “Saúde na Família” provizoriamente paradu iha Sentru Saúde Formosa, Dili, tanba limitasaun ba orsamentu.

“Sistema online ne’e mak paradu tanba uza pulsa no presiza orsamentu. Maibé, rejistu ho sistema manuál la’o hanesan baibain liuhusi Klínika Móvel hodi ba fatin sira hanesan iha eskola no iha komunidade nia leet,” Xefe Sentru Saúde Formosa, Jaime dos Reis Belo, ba Agência Tatoli iha nia kna’ar fatin, ohin.

Nia esplika katak presiza meiu atu bele fasilita sistema online hanesan orsamentu, internet, modem no laptop. Sentru refere la uza sistema online ne’e kuaze fulan neen resin ona.

Antes ne’e, iha Palásiu Governu, segunda (8/7), Ministru Saúde Interinu, Bonifácio Maukoli dos Reis, hateten sistema rejistrasaun “Saúde na Família” via eletrónika paradu provizóriu basaa sistema ne’e laduun di’ak, tanba ne’e agora dadaun uza hela sistema manuál.

“Ami-nia Konsellu Diresaun tau-matan hela ba kestaun ne’e, para oinsá ajusta atu reativa fila fali eletrónika, maibé ami sei estuda lai ninia vantájen no dezvantájen,” nia esplika.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here