Prezidente Konsellu Juventude Munisípiu Liquiçá, Laurindo dos Santos. Imajen espesiál

DILI, 8 jullu 2019 (TATOLI)—Prezidente Konsellu Juventude Munisípiu Liquiçá, Laurindo dos Santos, husu joven sira iha Munisípiu Liquiçá tenke kaer metin lema ‘Hu Iso, Lara Iso’.

“Ha’u-nia lia-menon ba joven Liquiçá, kaer metin ita-nia lema ‘Hu Iso, Lara Iso’ no ‘Isin Putu Lolon Bremu’ hodi tane ita-nia munisípiu ida ne’e sai unidade. Ita hamutuk hahi unidade. Labele haree ba koor. Labele haree ba ida ne’e foho-oan. Labele haree nia tasi-oan,” Laurindo dos Santos ba Agência TATOLI, iha Palásiu Governu nia oin, segunda (8/7).

Liafuan “Hu Iso, Lara Iso” mai hosi lian Tokodede ne’ebé maioria komunidade Liquiçá uza. “Hu Iso” katak FUAN IDA, “Lara Iso” katak LARAN IDA, sai konjuntu ida dehan “FUAN IDA, LARAN IDA”.

Nune’e mós, “Isin Putu” ne’e katak ISIN HAMUTUK, “Lolon Bremu” katak ITA-NIA ISIN LOLON, sai konjuntu ida dehan ITA-NIA ISIN LOLON HAMUTUK, nune’e garante estabilidade, pás no hametin liu-tan unidade iha Munisípiu Liquiçá.

Prezidente Konsellu Juventude Munisípiu Liquiça ko’alia asuntu ne’e relasiona ho grupu joven asalta malu iha Aldeia Baura, Suku Leorema, Postu Administrativu Bazartete, rezulta joven na’in-rua mate fatin.

Nia kontinua husu ba joven Liquiçá tenke unidade, labele fiar ema seluk sobu joven Liquiçá nia unidade.

“Se ita joven Liquiçá mak sobu ona unidade, ema hosi fatin seluk mai sobu ita ho halimar de’it. Labele rona demais ema seluk hodi mai interven iha ita-nia klaran para sobu ita-nia unidade. Joven Liquiçá tenke unidade. Kaer metin ba lema “Hu Iso, Lara Iso,” Laurindo fó hanoin ba juventude Munisípiu Liquiçá.

Tuir nia, antes ne’e, grupu juventude balun halo ona juramentu iha krúz ida iha Liquiçá, maibé oras ne’e problema kontinua mosu.

“La presiza ema seluk mai hadame ita. Ita Liquiçá-oan rasik mak hadame ita-nia aan. Tanba ne’e, ita hotu tenke kaer metin lema “Hu Iso, Lara Iso,” katak Prezidente Juventude Liquiçá, Laurindo dos Santos.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here