Treinadór Selesaun Nasionál U-18, Andi Susanto

DILI, 9 jullu 2019 (TATOLI)—Treinadór Selesaun Nasionál U-18, Andi Susanto informa, dadaun ne’e sira halo treinamentu másimu tebes ne’ebé semana ida hala’o dala lima, tanba ne’e jogadór sira hotu preparadu ona atu kompete iha jogu internasionál ASEAN Football Federation (AFF) ne’ebé sei realiza iha Vietname, agustu tinan ne’e.

“Semana ida ikus mai ne’e ita aranka ona. Entaun, agora ne’e treinu másimu tebes semana ida dala lima. Treinu maka’as ne’e mak tékniku, fiziku no mentál jogadór sira nian tenke di’ak.  Agora, sira ne’ebé ha’u hili ne’e di’ak ona,” tenik Andi ba Agência Tatoli iha edifisiu FFTL, Bairru Formosa, Dili, ohin.

Relasiona ho kondisaun treinamentu, treinadór ne’e relata katak fasilidade treinu sufisiente—iha kampu no dalaruma lori mós jogadór sira ba treinu iha fatin jinástiku (GYM) ne’ebé mak materiál kompletu.

Jogadór hamutuk 23 mak treinadór ne’e hili ona maibé seidauk desidi kapitaun ekipa. Tuir oráriu ne’ebé fó sai ona, Timor-Leste monu iha gru A hamutuk ho Indonézia, Myanmar, Laos, Filipina, Brunei Darussalam. Timor-Leste joga dahuluk kontra Brunei iha 5 agustu, hasoru Indonézia iha 7 agustu, hasoru Myanmar iha 9 agustu, hasoru Filipina iha 11 agustu no hasoru Laos iha 13 agustu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here