Koordenadór AS Ponta Leste, Osorio da Costa Florindo

DILI, 9 jullu 2019 (TATOLI)—Federasaun Futeból Timor-Leste (FFTL) serbisu hamutuk ho Liga Futeból Amadora (LFA) públika ona ba klube 8 ne’ebé hamahon-án iha Primeira Divizaun tenke iha mós ekipa Juvenil tuir regra Asian Football Confederation (AFC).

Tanba ne’e, AS Ponta Leste prepara ekipa Juvenil ne’ebé mak oras ne’e hala’o hela treinamentu. “Kona-ba ekipa Juvenil, ami nian preparadu ona. Formuláriu hosi LFA nian ami foti ona. Semana ida ne’e nia laran ami rejistu ona hanesan kompleta dokumentu para hatama fila fali ba LFA hodi halo verifikasaun,” tenik Koordenadór  AS Ponta Leste, Osorio da Costa Florind ba jornalista iha edifísiu FFTL, Bairru Formosa, Dili, ohin.

Fundadór AS Ponta Leste ne’e hatutan, kona-ba jogadór, ba sira laiha problema tanba jogadór barak loos—seniór hirak ne’ebé treinu nanis tiha ona maibé barak la joga tanba tinan seidauk to’o, entaun sira ne’e mak sei joga iha ekipa Juvenil.

Entretantu, maski FFTL no LFA nia kritéria ba jogadór Juvenil laiha kontratu, maibé Ponta Leste sei trata jogadór Juvenil sira ho karáter profisionál. “Jogadór sira ami sei trata ho profisionál. Iha kontratu ba sira maski sira tinan ki’ik (U-16). Ita haree jogu ne’e liga hotu foin hala’o ne’ebé ami hanoin se bele prepara di’ak,” nia haktuir.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here