Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 9 jullu 2019 (TATOLI)—Ministériu Agrikultura no Peska planeia ona atu reabilita irrigasaun boot sira hanesan Waibaba, Bonuk, Karaulun, Bebui, Bulutu, Maliana I no Maliana II iha tinan 2020.

“Ita sei foku ba reabilita irrigasaun boot  sira hanesan Waibaba, Bonuk, Karaulun, Bebui, Bulutu, Maliana I no Maliana II. Depois ne’e mak ita haree fali irrigasaun ki’ik-oan sira ne’e,” tenik Ministru Agrikultura no Peska, Joaquim José Gusmão dos Reis Martins ba TATOLI iha Palásiu Governu, Dili, ohin.

Joaquim dehan durante tinan rua (hahú 2017 to’o 2018) laiha osan manutensaun ba irrigasaun hirak ne’e, tan ne’e rezulta bee komesa halai la tuir dalan hodi sobu natar sira.

Ne’e duni, governante ne’e dehan iha orsamentu jerál Estadu 2020, MAP sei prevee orsamentu atu bele reabilita fali irrigasaun boot sira ne’e.

Kona-ba orsamentu, nia esplika, dadaun ne’e sei iha hela faze pakote orsamentál ne’ebé Ministériu Finansa  entrega ba MAP mak foin halo kalkulasaun orsamentu.

Tuir nia katak atu hasa’e produsaun hare, presiza duni irrigasaun di’ak hodi fasilita agrikultór sira halo natar.

“Ita atu hasa’e produsaun, maibé irrigasaun aat no bee laiha ne’e produsaun labele sa’e,” tenik ministru ne’e.

Tuir dadus MAP, iha tinan 2017, tempu ne’ebé difísil tebes ba iha agrikultór sira tanba infrenta hela situasaun (El Nino), maibé agrikultór sira konsege prodúz hare tonelada 36,995.87.  Ho produsaun hare tonelada 36,995.87, rezulta foos kuaze tonelada 22,197.25 konsege prodúz iha rai laran.

Daudaun ne’e, natar ektare 2,026.74 mak sei utiliza sistema tradisionál katak hare kari de’it iha natar laran, duut la hamoos, kontrolu ba adubu ladi’ak no  ektare 9,062.94  mak hare kari, fokit kuda fali, maibé la kuda ho liña no kontrola ba adubu, pestisida no bee ladún di’ak. Ektare 771, 57 mak implementa ona sistema prátika agrikultura di’ak, katak hare kuda ho liña, kontrola ba adubu, pestisida, bee di’ak no laiha duut.

Jornalista: Florensio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here