Diretór Jerál Estatistika, Elias dos Santos Ferreira, Imajen/Egas Cristovão

DILI, 08 jullu 2019 (TATOLI)-Komité ba komisaun organizadora Sensus Agrikultura, iha loron 15 fulan jullu 2019, sei fo sai naran aplikante ne’ebé liu vaga serbisu sensus agríkola.

“Ba maluk sira iha territóriu laran ne’ebé foin lalais tuir vaga ne’e, ita sei fó sai naran aplikante sira ne’ebé liu hodi serbisu ba sensus agríkola, iha loron 15 fulan jullu tinan ne’e,” informa Diretór Jerál Estatístika Elias dos Santos ba jornalista sira iha salaun enkontru edifísiu Diresaun Estatístika, Kaikoli, ohin.

Nia hateten, sensus agríkola ne’e sei presiza ema na’in 2584 mak sei serbisu iha parte intrevistagadór, supervizór no sukat rai.

Tanba ne’e, iha loron Ohin, Ministériu Finansa liuhusi Diresaun Jerál Estatístika, Ministériu Agrikultura hala’o enkontru alargada ho diretór Ministeriu Agrikultura, Diresaun Estatístika munisípiu sanulunu resin 12 inklui Rejiaun Administrativa Espesiál Oecusse-Ambeno (RAEOA).

Diretór Jerál Estatístika esplika objetivu husi sorumutu ne’e mak hodi halo esplikasaun kle’an kona-ba prosesu atu hahú sensus agríkola nune’e mós fó orientasaun balun.

Nia mós dehan, iha sorumutu ne’e ko’alia mós kona-ba treinamentu ne’ebé sei hala’o depois publika sai naran aplikante sira iha nasionál, munisípiu no postu administrativu sira, hafoin ne’e iha fulan balun tan sei realiza sensus ida ne’e.

Jornalista :Nelson de Sousa

Editór.       : Rafy Belo

HAKEREK NO HATÁN

Please enter your comment!
Please enter your name here