Gaspar Afonso

DILI, 7 jullu 2019 (TATOLI)Se o nia jornada moris ne’e nakukun, halo o nia naroman rasik ba hodi leno o nia dalan. Labele hein ema seluk atu mai fó roman ba o nia dalan.

Hala’o moris ida sei sente fásil liu, se antes ne’e ita sente ona sá maka terus. Hanesan Maromak promete ona, katak moris hosi defísil ida nia hún, loron ida sei sai di’ak. Tanba ne’e, atu sai susesu, labele ta’uk atu moris ho obstáklu.

Hanesan Gaspar Afonso, hasoru terus oioin iha ninia peregrinasaun moris. Iha nia moris, moris ho deskriminasaun hosi família rasik. La vale iha família nia matan. Família hateke ho matan ikun de’it. Konsidera nia la’ós ema. Hanesan balada.

Ninia kulpa ida de’it. Tanba nia moris ho defisiénsia matan. Moris ho defisiénsia, família konsidera nia hanesan balada ida ne’ebé laiha folin. La halo buat ida. Hein fó han no fó hemu de’it. Hahalok ida ne’e, buras to’o iha sosiedade ne’ebé nia horik ba.

“Sira kompara ha’u ba balada. Sira hateten nusá la fó han animál para boot ita fa’an hetan osan, hanesan nia ne’e ita fó han atu halo saida no hetan saida hosi nia,” Gaspar haktuir ninia pasadu ho matan-ween be nakonu.

Hanesan umanu, nia sente fuan moras ba situasaun ne’e. Maibé, nia optimista  de’it ho esperansa ida katak bainhira ema ruma hateten buat ne’ebé ladi’ak ba o, loloos ne’e nia hatudu katak nia ladi’ak liu o.

Atu fó valór ba ninia-án no ba ninia inan-aman rasik, nia hahú buka dalan. Dalan ida ne’ebé loron ida atu fó naroman ba sira-nia fututu be nabilan. Tanba ne’e, maski ho idade boot ona (20), nia disponível tama eskola primária hamutuk ho labarik otas ki’ik sira iha Eskola Primária ida iha Taibessi iha tinan 2001 no ramata iha tinan 2007.

Ho kondisaun matan ne’ebé labele haree rai maibé neon bele hatada dalan. Tan ne’e, durante tinan tolu nia laran nia ferik ho katuas lori nia ba-mai eskola, nia sente ne’e dependénsia ida. Entaun, nia desidi la’o mesak ba eskola.

“Ha’u tenke la’o mesak. Se ha’u dependénsia de’it ba inan-aman, ha’u sei la halo buat ida no ha’u labele hatene buat ida,” dehan Gaspar ne’ebé moris iha Aldeia Julaka, Suku Lahamea, Postu Administrativu Maliana, Munisípiu Bobonaro,  15 setembru 1971 ne’ebé iha maun-alin hamutuk na’in 8 ne’e.

Tanba ho idade avansadu, nia buka dadaun dalan terik atu hasa’e ninia nível edukasaun. Hanesan naroman leno hetan dalan, Gaspar nia mehi ne’e sai realidade. Iha tinan 2010, nia tuir ezame ekivalénsia pre-sekundária iha Bandung, Indonézia no iha tinan 2017, nia hetan oportunidade tuir ezame ekivalénsia nível sekundária nian iha Kúpaun, Indonézia.

Fila mai iha tinan 2018, nia kontinua ninia estudu iha Universidade Nacional Timor Lorosa’e (UNTL), iha Departamento Ciência Política, Faculdade de Ciências Sociais.

“Ita hatene Timor-Leste laiha adekuadu ba ema defisiénsia matan atu ba eskola tanba laiha fasilidade, maibé ha’u uza meius rasik—uza flash recorder bainhira ba eskola halo gravasaun ba dosente nia esplikasaun hotu durante iha aula laran. Kona-ba traballu komputadór babain hanesan ema uza, maibé ami uza software ida ho naran jaws talking bele fasilita ami ko’alia, no iha telefone iha aplikasaun ho naran access abilities ne’e bele lee mai ita,” nia haktuir ba Agência Tatoli iha edifísiu Asosiasaun Halibur Defisiénsia Matan Timor-Leste, Manleuana, Dili, foin lalais.

Estudu ida ne’e, fó naroman ba Gaspar hodi leno ninia dalan rasik. Dalan sai naroman. Dalan ba susesu. La imajina, naroman ida ne’e haleno nia dalan lori hatuur nia iha kargu leten aas. Oras ne’e, nia eleitu sai Diretór Asosiasaun Halibur Defisiénsia Matan Timor-Leste ne’ebé antes ne’e nia la hanoin-hetan atu loron ida bele okupa pozisaun ida ne’e.

“Uuk ema hateke ha’u ho matan sorin de’it, maibé agora ita hanesan ona. Laiha diferente. Diferente maka ha’u labele haree, maibé kona-ba koñesimentu, kapasidade no abilidade, kuandu ha’u badinas, ha’u mós hanesan ho ita-boot sira,” nia tenik.

Bele hetan ona pozisaun aas maibé nia seidauk kontente loloos. Tanba, moris seidauk kompletu kuandu laiha murak. Ba nia, bainhira laiha murak (doben), moris ne’e lahó ksolok no moris ida laiha esperansa hanesan fraze romántika baluk hateten: “Terus hirak ho susar hotu… Loron ida ha’u sei haluha… Wainhira ha’u moris ho o… Ho o sei moris haksolok”.

Tebes duni. Difísil atu haluha terus no susar hotu be akontese liu ona bainhira laiha parseira-moris ne’ebé fó esperansa ba ita-nia moris. Tanba ne’e, Gaspar maski ho kondisaun defisiente, la sai lutu ba nia atu la’o fihir parseira-moris.

Nia konsege hetan parseira ida ne’ebé prontu atu moris no mate hamutuk ho nia. Nia orgullu bele hetan parseira ida ne’e tanba la haree ba ninia defisénsia maibé haree ba ninia domin no ninia fieldade.

Nia haktuir, oras ne’e, nia iha kaben ne’ebé nia kondisaun hanesan ho nia, defisiente matan. Sira iha oan feto rua ho kondisaun normál.

Fou-foun, hafoin kria relasaun domin ho nia murak (kaben), nia hasoru obstáklu boot ida. Família hosi ninia kaben dúvida ba nia prezensa hanesan mane-foun. Katak, nia bele sustenta família to’o rohan ka lae. Maibé, nia hatán ho liafuan simples de’it.

“Nehek de’it bele buka hahán ba nia feen no oan, tanbasá ita ema labele. Ita só problema iha matan de’it, maibé ita-nia fuan, neon, kakutak no sentimentu hanesan ho sidadaun sira seluk, tanbasá ita labele,” nia hateten.

“Bainhira ita asiste filmájen Jesus katak bainhira Jesus atu hakotu iis, Nia ko’alia liafuan tolu (3) ba mundu dehan buka sei hetan, husu sei fó no dere odamatan sei nakloke.  La’ós tuur dere odamatan nakloke de’it maibé tenke liuhosi esforsu, tanba buat hotu Nai haraik ona mai ita. Ne’ebé, hanesan ami defisiénsia kuandu barukteen, entaun sei lahatene buat ida,” Gaspar subliña.

Iha mundu ne’e, ema esforsu-na’in no badinas mak bele sai susesu. “Ha’u mós hanesan ne’e. Biar ha’u-nia matan la haree maibé ha’u badinas, interese no ho vontade maka’as ha’u bele sai susesu. Ne’e ha’u nia prinsípiu,” nia haklaken.

Tanbasá hetan defisiénsia ba matan? Iha momentu ne’ebá, tinan 1981-1985, nia hahú hetan moras hanesan moras sarampu, matan mean, kabun moras no isin manas.

Nia dehan, momentu ne’ebá, nia inan-aman buka aimoruk ida mai kura, lori aimoruk ida seluk mai kura, lori aimoruk hosi Bali mai kura, maibé matan taka semana ida loke mai matan laran tasak hanesan fahi ne’ebé ema habai iha loron. Matan fuan sorin mós komesa tabele tanba bola mikasa kona halo nia matan fuan nakfera. Ta ne’e, nia sofre moras tinan ida nia laran atu mate la mate.

                                                Antesedente

Iha 1 jullu 2001, nia harii Organizasaun  Asosiasaun Halibur Defisiénsia Matan Timor-Leste ho naran AHDMTL. Hafoin tinan 3, nia hetan oportunidade ba tuir estudu komparativu iha Malázia kona-ba atu estabelese Konsellu Nasionál Direitu ba ema ho defisiénsia, hamutuk ho organizasaun defisiénsia no Ministériu Solidariedade Sosiál.

Iha 15 agustu 2015, tuir estudu komparativu iha South Australia semana 4, kona-ba Early Prevensia for Disability no tuir treinamentu Breath Training kona-ba Konvensaun Direitu ba Ema ho Defisiénsia iha Jakarta-Indonézia durane semana ida (2015).

 Hafoin ida ne’e, fila mai nafatin halo advokasia direitu ba ema ho defisiénsia iha iha tinan 2016. Tuir treinamentu kona-ba Breath Training iha Bogor-Indonézia durante semana ida (2016). Hafoin ne’e, tuir Second Konference CWR Network Asia Pacific iha Malázia (2016).

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here