Kontra atake entre jogadór Karketu Dili FC no Académica FC. Imajen Tatoli/Hortençio Sanchez

DILI, 6 jullu 2019 (TATOLI)—Klube Universidade Nacional Timor Lorosa’e (UNTL), Académica FC, susesu hadau pontu tolu hosi armada Karketu Dili FC alias Matak Malirin ho golu úniku 1-0 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lorokraik.

Vitória ne’ebé Académica hetan, lori ekipa ne’e hanehan klube zigante kapitál Dili ne’e hodi okupa fali númeru ida okos liu tuir tabela klasifikasaun provizóriu. Golu úniku hosi Académica ne’e prodúz hosi jogadór Augosto da Costa (14) iha minutu 49.

Maski lakon, treinadór Karketu, Haryadi Hengkan ba jornalista hateten, jogu mak hanesan ne’e ona katak iha lakon no manán. “Golu ohin ne’e fallansu iha defeza nian, maibé jogu sempre hanesan ne’e. Ita bele prepara-án di’ak maibé jogadór halo fallansu uituan, ita bele lakon. Alvu ami nian ohin tenke manán maibé la konsege,” tenik Haryadi.

Iha sorin seluk, Kapitaun ekipa Académica, Nélson António (3), sente orgullu tanba ohin loron Académica konsege fera manu-tolun ne’ebé durante ne’e sira lori hela.

“Ha’u sente kontente tebes. Académica ohin hadeer hikas fali, maibé ami tenke serbisu maka’as nune’e jogu tuir mai ami bele  manán para bele sai hosi liña mean,” dehan Nélson.

Nia informa tan, jogu primeira volta besik ramata ona. Tan ne’e, klube iha ona hanoin atu sosa jogadór estranjeiru balun nune’e bele reforsa tan sira.

“Klube hanoin ona katak dalaruma jogu primeira volta ramata sei sosa tan jogadór estranjeiru balun nune’e bele reforsa Académica para bele hasai ami hosi zona mean,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here