ERMERA, 05 jullu 2019 (TATOLI)-Prioridade primeiru ba Oitavu Governu Konstitusionál iha tinan 2020 mak bee moos ba konsumu.

“Ba tinan oin governu ida ne’e primeiru fó prioridade uluk bee moos. Nune’e mós, uma Habitasaun,saúde, edukasaun, malnutrisaun no seluk tan,” garante Primeiru Ministru (PM) Taur Matan Ruak iha diálogu ho komunidade Ermera hodi fahe informasaun kona-ba programa prioridade governu nian ba tinan 2020-2023.

Tuir PM, daudaun ne’e problema boot iha ita-nia nasaun ne’e mak ki’ak no malnutrisaun. Malnutrisaun kontribui moras lumbringa, diárea.

“Entaun prioridade primeiru mak bee. Tanba ne’e, iha Dili liuhusi Estadu Unidu Amérika liuhusi Millenium Challenge Corporation (MCC) ne’ebé sei investe ba bee konsumu iha kapitál Dili,” tenik xefe governu ne’e.

Enkuantu ba Kapitál munisípiu sira hanesan Baucau, Lospalos, Viqueque no Same, tuir xefe governu katak dadaun ne’e Ministériu Obras Publika ho Banku Dezenvolvimentu Aziátiku (ADB-sigla inglés) sei hala’o hela estudu.

“Investimentu ne’e MOP ho ADB mak sei halo liuhusi fundu emprestimu. Nune’e mós iha munisípiu sira seluk para bele hadi’a bee konsumu nian,” dehan Primeiru-ministru, Taur Matan Ruak.

Nia dehan tan, ba postu no suku sira governu mak sei investe. “Ita hotu hatene iha kuartu to’o sétimu governu fokus liu ba eletrisidade. Daudaun ne’e, eletrisidade atinji ona pursentu 84 no falta pursentu 16 mak seidauk. Governu ida ne’e kontinua hatutan, espera katak buat hotu la’o di’ak to’o Oitavu Governu nia mandatu ramata eletrisidade bele atinji pursentu 100”.

Nia akresenta, esforsu Oitavu Governu ba prioridade primeiru ba tinan oin nian hili bee hanesan prioridade primeiru. Espera katak bee bele mós fo nia kontribuisaun redus, tanba dadaun ne’e populasaun totál pursentu 70 itál iha bee maibé bee ida ne’ebé seidauk organizadu didi’ak.

“Tanba ne’e saida mak ita hanoin, moderniza uitoan (bee), aumenta ninia kapasidade armazenamentu bee nian, postu distribuisaun no kanalizasaun,” konklui Xefe Governu Oitavu Konstitusionál, Taur Matan Ruak.

Jornalista :Nelson de Sousa

Editór       : Rafy Belo

HAKEREK NO HATÁN

Please enter your comment!
Please enter your name here