Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira.

DILI, 05 jullu 2019 (TATOLI)-Konfrontu entre grupu juventude iha Aldeia Baura, Suku Leorema, Postu Administrativu Bazartete, Munisípiu Liquiça, sei kontinua hela tanba ne’e iha sesta madrugada (05/07/2019), sunu tan uma hamutuk 13 no motor hitu.

Konfrontu ne’ebé rezulta joven na’in rua mate fatin iha kinta loro-kraik (04/07/2019), estraga mós uma tolu ne’ebé tuda rahun husi grupu juventude sira.

Komandante Komandu Operasionál Nasionál (KKON), Superintendente Xefe, Pedro Belo informa, konfrontu entre grupu  kriminozu iha Aldeia Baura, akontese iha tempu bazar, ne’ebé  derrepente grupu joven sira ataka malu hodi oho vítima na’in rua mate iha fatin, inklui ema na’in tolu kanek todan tanba hetan sona iha isin lolon.

Vítima sira ne’ebé kanek, oras ne’e, evakua ona mai Ospitál Nasionál Guido Valadares (HNGV-sigla portugés) hodi hala’o tratamentu saúde.

“Kazu ne’e rezulta ema na’in rua mak mate,  na’in tolu kanek todan, uma 13 mak hetan sunu, no motór hitu mós hetan sunu no uma ne’ebé ema estraga hamutuk tolu,” informa  Pedro Belo ba jornalista, ohin, liu husi konferénsia imprensa iha Komandu PNTL, Caicoli, Dili,

Hafoin akontesimentu, Komandu Unidade Polisia Espesiál ho Polisia Munisipiu Liquiça kaptura kedas suspeitu ida nu’udar mós lider eis organizasaun arte marsiál ne’ebé deskonfia envolve iha kazu.

Suspeitu ne’e detein ona iha sela Polisia  Liquiça hodi halo investigasaun kle’an.

“Dezde horiseik kedas too kalan polisia akalma ona situasaun hodi buka tuir nafatin autór sira seluk,” informa Pedro Belo.

Kona-ba situasaun seguransa agora la’o normál no Polisia Ofisial Suku (OPS) ho autoridade lokál mós aviza ba populasaun ne’ebé halai atu idak-idak fila fali ba sira nia uma.

Mate isin vítima na’in rua mós evakua  ona mai HNGV hodi halo autópsia.

Jornalista         : Eugénio Pereira

Editór               : Francisco Simões

1 KOMENTÁRIU

  1. Sujere dt ba comandante jeral PNTL NIAN HO FFDTL NIAN hare nia membros sira nebe mk mete ht arte marciais dk liu hasai tia nia husi instituisaun dt, lae to tmpo problema hnsn nee mk sr hlo operasaun hetan sr nx maun alin ble hlo hl krimi mos sr husik liu dt.

HAKEREK NO HATÁN

Please enter your comment!
Please enter your name here