Ministru Obra Públika, Salvador Eugénio Soares dos Reis Pires. Imajen Tatoli/Egas Cristóvão

DILI, 05 jullu 2019 (TATOLI)—Oitavu Governu Konstitusionál liuhusi Gabinete Primeiru-Ministru (GPM) estabelese ona ekipa avaliasaun no levantamentu ba projetu 143, molok halo pagamentu.

Ministru Obra Públika, Salvador Eugénio Soares dos Reis Pires, informa ekipa ne’e sei lidera hosi Gabinete Primeiru-Ministru atu hala’o levantamentu no avaliasaun ba projetu 143, molok hala’o pagamentu.

“Normálmente ami mak nu’udar na’in ba projetu, maibé projetu ho kustu milliaun $1 ba leten ne’e primeiru-ministru mak tenke halo kontratu ho kontratór. Se ministru tama tenke iha delegasaun kompeténsia hosi primeiru-ministru,” tenik ministru ne’e ba Tatoli, ohin, iha edifísiu Ministériu Finansa, Aitarak-Laran, Dili.

Governante ne’e dehan, ekipa ne’ebé GPM estabelese ne’e involve mós Ministériu Obrá Públika, Ministériu Planeamentu Investimentu no Estratéjika (MPIE), Ajénsia Dezenvolvimentu Nasionál (ADN), Konsellu Administrasaun Fundu Infraestrutura (KAFI) hala’o levantamentu no avaliasaun ba projetu 143 atu fasilita Governu hodi foti desizaun ba pagamentu.

“Entre projetu 143 ne’e, projetu 45 mak laiha kontratu. Maibé, iha dezembru tinan kotuk hosi projetu 45 aprova ona projetu 15, tanba projetu hirak ne’e nia karáter urjénsia, ne’ebé aprezenta hosi Ajénsia Dezenvovlimentu Nasionál (ADN), Komisaun Nasionál Aprovizionamentu (CAN-sigla portugés) no Ajénsia relevante iha KAFI,” Salvador haklaken.

Molok ne’e, Parlamentu Nasionál liuhusi pedidu bankada FRETILIN submete rekerimentu inkéritu parlamentár atu estabelese Komisaun Inkéritu Parlamentár (KIP) ba projetu 143 ho montante osan milliaun $345 ne’ebé KAFI aprova iha loron 19 jullu 2017.

Hafoin KIP konklui relatóriu, la konsege aprova iha Parlamentu Nasionál, tan ne’e, Oitavu Governu Konstitusionál foti desizaun hodi halo verifikasaun rasik ba projetu 143 refere.

Jornalista: Floresio Miranda Ximenes

Editór: Xisto Freitas

HAKEREK NO HATÁN

Please enter your comment!
Please enter your name here