Primeiru-Ministru, Taur Matan Ruak,(Klaran ba Loos) Akompaña Husi Prezidente Parlamento Nacional Arão Noé de Jesus da Costa Amaral(Klaran) no Prezidente Tribunál Rekursu, Deolindo dos Santos (Karuk) ho Membro Governu Hasai Foto Hamutuk Organizasaun Internasional Nivel Rejional no Multilateral Sira ne’ebé Sai Hanesan Parseirus Dezenvolvimentu Timor-Leste.Iha Salaun Auditoriu Ministériu Finansas,Aitarak Laran,Dili,Kinta (04/07/2019). Imajen/Egas Cristovão

DILI, 04 jullu 2019 (TATOLI)Primeiru-Ministru (PM), Taur Matan Ruak halo abertura ba diálogu no koordenasaun nível aas entre Governu Timor-Leste no Parseiru Dezenvolvimentu sira (TLDPM-Timor-Leste’s Development Partners Meeting), ho tema “Hametin liután Koordenasaun kona-ba Finansiamentu ba Dezenvolvimentu” no iha biban hanesan halo lansamentu ba dokumentu “Polítika Asisténsia Esterna”.

Iha ninia diskursu iha TLDPM, Xefe Governu afirma agora daudaun prioridade governu mak konsentra ba projetu foun tuir kompromisu ba povu.

“Prioridade hirak ne’ebé buka atu konsentra liu ba investimentu iha projetu foun sira no atu hetan rezultadu ne’ebé di’ak liután iha indikadór no kompromisu sira ne’ebé asume ona ba ami-nia povu, iha Planu Estratéjiku Dezenvolvimentu Nasionál nian (PEDN) no iha Roteiru ba Implementasaun Objetivu sira husi Dezenvolvimentu Sustentavel (ODS), ne’ebé ninia rezultadu mak ohin aprezenta mós, iha relatóriu kona-ba Revizaun Nasionál Voluntária”, tenik PM iha diálogu ho parseiru dezenvolvimentu sira iha Salaun Ministériu Finansa, kinta ne’e.

Tuir PM, kompromisu Governu mak atu hadi’a moris-di’ak sosiál, protesaun sosiál no sidadania, investimentu iha ekonomia no iha konsolidasaun finansas públikas, konetividade nasionál, konsolidasaun no reforsu ba defeza, seguransa no relasaun esterna sira, no ikus liu mak konsolidasaun no reforsu ba justisa, demokrasia no direitu umanu.

“Melloria ne’ebé hakarak kombate hamlaha, nutrisaun ladi’ak no moris-kiak, liuhusi servisu sira ne’ebé di’ak liu iha saúde, edukasaun, meiu ambiente, hodi aumenta oportunidade empregu nian, produtividade no kreximentu país nian”, reforsa Xefe Governu.

PM mós dehan, hakarak hetan aumentu Rendimentu Sustentável Estimadu (RSE), hodi estimula inisiativa privada, diversifikasaun ekonomia no aproveitamentu di’ak husi biban oioin dezenvolvimentu nian,  husi baze  no husi setór ekonómiku no produtivu sira nasaun nian.

Nune’e mós, nia akresenta investimentu iha infraestrutura estratéjika sira, ne’ebé bele promove kriasaun empregu no hamosu setór privadu ida-ne’ebé forte, ho apoiu husi rekursus umanus no instituisaun públika sira, ne’ebé iha kapasidade, abilidade no besik liután ba sidadaun no komunidade sira.

“Opsaun nesesária sira-ne’e mak foka liu ba dezafiu prinsipál no problema sira, ne’ebé afeta ba distribuisaun ekuitativa husi rikusoin nasionál, no ne’ebé difikulta koezaun no ekilíbriu territoriál, opsaun nesesária sira ne’e sei bele hatán, loloos, ba país rurál ne’ebé maka haluha tinan naruk no presaun ne’ebé la iha kontrolu husi país urbanu,” katak ezekutivu ne’e.

Ho konviksaun, Xefe Governu hateten, polítika ajuda públika foun ne’ebé lansa hamutuk ho avaliasaun finansiamentu ba dezenvolvimentu, iha pozisaun atu define senáriu envolvimentu ne’ebé di’ak liu, hodi hetan proveitu boot husi asisténsia esterna nian ba dezenvolvimentu, ne’ebé reprezenta besik millaun $201 husi investimentu ba kada tinan.

Nune’e, tuir PM atu mobiliza fonte sira finansiamentu nian no konsege utilizasaun ne’ebé di’ak liután husi rekursu finanseiru ne’ebé iha ona ho forma efikás, efisiente, transparente, responsável liu, atu evita duplikasaun sira, despeza supérflua ka deznesesária sira, ne’ebé enkuadra ho planu, objetivu no rezultadu sira ne’ebé atu atinje, kontinua sai hanesan preokupasaun no prioridade, ne’ebé hakarak hametin no haforsa, hamutuk ho parseiru no doadór sira, sentimentu konfiansa nian ba Governu no ba instituisaun Estadu nian sira rasik.

Iha oportunidade ne’e, Primeiru-Ministru (PM), Taur Matan Ruak halo lansamentu ba dokumentu Polítika Asistensia Esterna (Foreign Aid Policy) ba Parseiru Dezenvolvimentu sira.

Dokumentu ne’e, Governu pretende hodi aliña atividade sira hotu hosi parseiru dezenvolvimentu sira ho prioridade Governu nian, defini matadalan foun kona-ba aprovasaun hodi mellora koordenasaun atividade sira hotu no integra portefóliu projetu sira ne’ebe finansia hosi doadór sira iha planu nasionál ho sistema orsamentu nian.

Reuniaun Parseiru Dezenvolvimentu ne’e partisipa hosi Ofisiál nível altu Timor–Leste nian ne’ebé sei inklui Prezidente Parlamentu Nasionál, Arão Noé Amaral, Prezidente Tribunál Rekursu, Deolindo dos Santos, Embaixadór no Reprezentante  sira hosi organizasaun internasionál nível rejionál no multilaterál sira ne’ebé sai hanesan parseiru ba dezenvolvimentu Timor-Leste nian.

Jornalista :Julia Chatarina

Editór: Rafy Belo

HAKEREK NO HATÁN

Please enter your comment!
Please enter your name here