Treinadór klube Boavista FC Timor, Fabiano José Flora

DILI, 4 jullu 2019 (TATOLI)—Diretór Tékniku Federasaun Futeból Timor-Leste (FFTL), Gaspar Quintão, informa atuál treinadór klube Boavista FC Timor, Fabiano José Flora mak sei sai treinadór provizóriu ba Selesaun Nasionál hodi partisipa iha eventu internasionál Sea Games ne’ebé sei hala’o iha Manila-Filipina, setembru mai ne’e.

Quintão dehan, Fabiano sai treinadór tanba ezekutivu FFTL haree katak treinadór refere nia prestasaun durante kaer klube zigante Boavista iha rezultadu pozitivu no treinadór ne’e rasik iha esperiénsia barak tanba kaer ona klube sira iha Europa.

“Treinadór Boavista ne’e agora dadaun iha sertifikadu treinadór nian ho nível A hosi Union of European Football Associations (UEFA). Tanba ida ne’e mak ezekutivu desidi nia kaer ita-nia Selesaun Nasionál. Nia mós kaer ona ita-nia jogador lokál sira, ne’ebé nia hatene ona ita-nia jogadór sira nia karáter,” tenik Gaspar ba jornalista sira iha edifísiu FFTL, Bairru Formosa, Dili, ohin.

Nia hatutan, konfiansa ne’ebe FFTL fó ba treinadór ho nasionalidade portugés ne’e ba de’it jogu Sea Games, maibé bainhira iha rezultadu di’ak mak foin desidi nia kaer loloos Selesaun Nasionál.

“Bainhira nia kaer Sea Games hatudu rezultadu di’ak, foin ami desidi atu kaer Selesaun Nasionál ba tinan hira, ne’e depois ami haree lai,” Gaspar informa.

Antes ne’e, FFTL fó konfiansa ba treinadór ho nasionalidade japoneze, Norio Tsuketate, maibé la atinje objetivu ne’ebé Timor-Leste hakarak. Tanba ne’e, iha fulan kotuk, FFTL foti ona desizaun hodi hapara treinadór refere.

Tanba FFTL fó sai fiksu ona kona-ba Fabiano mak sei kaer Selesaun Nasionál, Agência Tatoli tenta konfirma ho treinadór refere via WhatsApp maibé treinadór ne’e rasik deklara labele atu fó komentáriu.

Fó hanoin fali, treinadór ne’e oras ne’e dadaun kaer sertifikadu profisionál UEFA grau ‘A’ ne’ebé maka hala’o ona nia kareira hanesan treinadór hafoin hetan esperiénsia hosi ekipa koñesidu iha Europa hanesan Académica, Lazio, Juventus, PSG, MU, SLB Benfica no sai mós treinadór prinsipál iha klube Primeira Divizaun Myanmar no Selesaun Nasionál Myanmar nian.

Jornalista: Hortençio Sanchez

Editór: Xisto Freitas

1 KOMENTÁRIU

  1. IHA NOTISIA DESPORTU NIAN, NEBE MENSIONA FABIO MAKA LORI BOAVISTA FC SAI KAMPEAUN IHA EPOKA 2018, NEE LALOS PRESIJA KONFIRMA DIDIAK MOLOK HAKEREK. TANBA TREINADOR ARGENTINA ELADIO ROJAS MAKA LORI BOAVISTA SAI KAMPEAUN IHA EPOKA 2018. OBRIGADA

HAKEREK NO HATÁN

Please enter your comment!
Please enter your name here