Ministru Justisa Manuel Cárceres da Costa, Imajen/Egas Cristovão

DILI, 2 jullu 2019 (TATOLI)–Ministru Justisa, Manuel Cárceres da Costa hateten, tinan oin (2020), Ministériu Justisa (MJ) sei serbisu hamutuk ho Autoridade Órgaun Judisiál hanesan Prezidente Tribunál Rekursu (PTR), Ministériu Públiku (MP) no Defensór Públiku (DP) atu identifika autór judisiál na’in 20 ba hasai kursu mestradu iha Universidade Coimbra, Portugal.

“Ohin, ha’u mai hasoru PTR hodi ko’alia kona-ba formasaun autór judisiál na’in 20 hosi MP, DP, juiz sira inklui mós ofisiál justisa atu ba hasai kursu mestradu iha Portugal, ho durasaun tinan rua ka tinan rua ho balun, atu iha futuru mai bele ajuda di’ak liu-tan sistema judisiál iha Timor,” tenik nia ba jornalista sira hafoin ramata hala’o enkontru ho PTR, iha Tribunál Rekursu, Caicoli, Dili, ohin.

Nia hatutan, kritériu mak rigorozu uituan hanesan autór júdisial sira tenke hasai kursu direitu ho grau lisensiatura, tenke hatene hakerek no ko’alia iha lian portugés, atu bele fasilita sira durante iha prosesu hirak ne’e.

Ministru mós esplika katak sira mós sei haruka juize sira, defensór públiku no prokuradór balun atu hasai kursu espesializasaun iha Nasaun Ko’alia Lian Portugés (CPLP-sigla portugés) ne’ebé mak disponível atu sira ida-idak bele kapasita-aan di’ak liu-tan.

Tanba ne’e, iha enkontru ohin loron ne’e, parte rua konkorda malu atu fó formasaun ba autór júdisial sira, tanba governu sei prevee orsamentu ba asuntu ne’e iha tinan 2020.

Jornalista: Domingos Piedade

Editór: Xisto Freitas

HAKEREK NO HATÁN

Please enter your comment!
Please enter your name here