Sekretariu Estadu Asuntu Kombatantes no Libertasaun Nasionál, Gil da Costa Monteiro ‘OAN SORO’. Imajen/Tatoli/Eugénio Pereira

DILI, 03 jullu 2019 (TATOLI) – Sekretáriu Estadu ba Asuntu Kombatente no Libertasaun Nasionál, Gil da Costa Monteiro “Oan Soru” hateten, Konsellu Veteranu hanesan uma-lisan veteranu sira nian para bele kontrola no bele fó resposta ba preokupasaun ema hotu nian durante ne’e, liuhosi konsellu ne’e.

“La-signifika sira (Konsellu Veteranu) hamriik ohin, aban sira halo hotu perfeitu, maibé ida ne’e duni mak sai esperansa atu lori veteranu sira. Ezemplu iha estatutu Kombatente Libertasaun Nasionál, dehan veteranu tenke kontribui iha dezenvolvimentu nasionál ho estabilidade sosial,” tenik Oan Soru ba jornalista sira iha Palásiu Governu, kuarta ne’e.

Nia hatutan: “Uluk kedan ha’u hanesan ema veteranu sempre halo pergunta ba governante sira atu kontribui ba dezenvolvimentu nasionál no estabilidade sosiál liuhosi ponte ka hakuur de’it husi mota? Agora ha’u membru governu, ne’ebé ha’u husu fali ba ha’u-nia nia aan saida mak ha’u bele halo? No nia resposta mak agora daudauk ne’e”.

Governante ne’e informa, atu harii Konsellu Veteranu agora dadauk iha faze Konferénsia Munisipál ne’ebe hahú daudaun ona no loron hirak liubá nia foin halo abertura konferénsia iha Lospalos no tuir mai sei kontinua iha Baucau, Manatuto no kontinua fazeadamente tuir alvu Komisaun Instaladora nian.

Konferénsia Minisipál ne’e sei finaliza iha fulan outubru hafoin Kongresu Nasionál sei realiza iha loron veteranu 1 to’o 3 marsu 2020.

Iha kada munisípiu, sei hili ema na’in lima no entre ema na’in lima aban bain rua sei hili sira nia reprezentante rasik atu mai tur iha estrutura nasionál, ne’ebé sei liuhosi Kongresu Nasionál.

Jornalista: Julia Chatarina

Editór: Rafy Belo

HAKEREK NO HATÁN

Please enter your comment!
Please enter your name here