Koordenadora Interina ba Reforma Lejizlativa MRLAP, Melisa Silva Caldas. Imajen/Egas Cristovão

DILI, 03 jullu 2019 (TATOLI) – Rekomendasaun importante husi Komisaun Reforma Lejizlativa (KRL) iha VI Governu Konstitusionál ida mak Programa Reforma Setór Justisa, ne’ebé tenke hamosu Lei Organizasaun Judisiária tanba agora daudauk Timor-Leste sei adota regulamentu UNTAET durante tinan 20 nia laran ona.

Portavós Ministériu Reforma Lejizlativa no Asuntu Parlamentár (MRLAP) no Koordenadora interina Reforma Lejizlativa, Melisa Silva Caldas hateten, momentu KRL halo estudu kona-ba Tribunál iha Timor-Leste, identifika no rekomenda ba Governu atu halo Lei Organizasaun Judisiária. Maibé, atu halo lei ne’e labele bazeia de’it husi Konstituisaun Repúblika Demokrátika Timor-Leste (KRDTL), maibé tenke husi dadus empíriku Tribunál.

“Rekomendasaun husi Komisaun Reforma Lejizlativa ne’e, la-hare ba saida mak ita estabelese tuir Konstituisaun, maibé haree ba estatístika husi ita-nia Tribunál sira rasik, husi dadus no husi nesesidade ne’ebé povu hato’o mai mak ita bele kria tipu husi kazu sira,” tenik Koordenadora interina, Melisa Silva Caldas ba Agência TATOLI iha nia kna’ar fatin iha Palásiu Governu, kuarta ne’e.

Nia hatutan: “Ezemplu ita hamosu ona kazu barak iha área komersiál kona-ba ema ne’ebé halo negósiu, dalaruma iha kontratu bele falla, entaun kazu barak hatama ona ba Tribunál”.

Eis-membru Permanente KRL ne’e dehan tan, husi kazu hirak iha Tribunál, liuhosi Lei Organizasaun Judisiária, bele estabelese seksaun ka unidade ruma hodi halo espesializasaun ba Juis sira atu haree ba kazu bainhira halo julgamentu iha Tribunál.

Tuir Nia, polítika muda uitoan maibé VIII Governu Konstitusionál iha interese atu halo Lei Organizasaun Judisiária no agora hamutuk ho Parlamentu Nasionál (PN) ne’ebé manifesta ona interese.

Melisa mós haktuir, rekomendasaun husi KRL barak tanba komisaun ne’e momentu ne’ebá halo estudu hodi hamosu rekomendasaun ba Governu, maibé estudu sira ne’e la’ós ba área hotu-hotu.

Nia dehan tan, KRL iha mandatu ne’ebé badak no determinadu ho mandatu VI Governu Konstitusionál,  tanba ne’e bele foku ba área sira ne’ebé mosu husi konsultasaun públika ne’ebé halo iha kedas inísiu, husi Autór Judisiáriu sira, Organizasaun Naun Govermentál (ONG), no akademia sira, hodi identifika área ne’ebé mak presiza atu halo estudu ruma.

“KRL iha momentu ne’ebá halo estudu ba Sistema Justisa Formál iha Tribunál sira, Direitu Informál, Diretu Tradisionál, oinsá mak Sistema Rezolve Konflitu iha komunidade nia leet no mós rotáriu ida kona-ba Diretu Penál Timor-Leste no kona-ba Diretu Komersiál Timor-Leste. Ida ne’e mak estudu ne’ebé KRL halo ho kle’an no hamosu rekomendasaun balun,” katak Portavós MRLAP, Melisa Caldas.

Notísia Relevante: http://www.tatoli.tl/2019/06/ezbosu-ba-organizasaun-judisiaria-iha-ona-faze-estudu/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here