Sekretáriu Estadu Asuntu Kombatente no Libertasaun Nasionál, Gil da Costa Monteiro “Oan Soru”. Imajen/Eugénio Pereira

DILI, 3 jullu 2019 (TATOLI)–Governu liuhosi reuniaun Konsellu Ministru aprova Proposta Dekretu-Lei nú. 8/2009, 15 janeiru, ne’ebé aprezenta husi Sekretáriu Estadu ba Asuntu Kombatente no Libertasaun Nasionál, Gil da Costa Monteiro “Oan Soru”, hodi halo alterasaun Rejime Atribuisaun Bolsa Estudu ba Kombatente no Mártir Libertasaun Nasionál sira-nia oan.

Sekretáriu Estadu ba Asuntu Kombatente no Libertasaun Nasionál, Gil da Costa Monteiro “Oan Soru” hateten, durante ne’e, Lei koa’lia kona-ba veteranu sira ne’ebé sei moris nia oan labele hetan asesu ba bolsu estudu no sira mate lai mak sira nia oan bele hetan direitu.

“Ida mós nia mate lai mak nia oan bele hetan direitu ba bolsu estudu, inklui Primeiru-Ministru, Prezidente Repúblika ne’ebé hanesan veteranu, tanba lei ne’e mak hateten hanesan ne’e. Tanba razaun ne’e hotu ita halo alterasaun, maibé la signifika altera ohin, aban ka bainrua veteranu sira borong nia oan mai hotu, lae. Tenke liuhusi ninia regra barak no liuhusi fazeadamente,” nia haklaken ba jornalista sira iha Palásiu Governu, kuarta ne’e.

Tuir governante ne’ebé hanesan mós veteranu ne’e, kuandu halo alterasaun ba lei tenke haree ba ninia impaktu sira saida mak atu mosu.

“Alterasaun ne’e fó vantajen ida para bele fó oportunidade ba veteranu sira ne’ebé sei moris hela. Hanesan ezemplu sira ne’ebé iha ai-laran tinan 24, sira-nia oan sei kiik hela maibé aman mate ka aman idade kbiit laiha,” Oan Soru esplika.

Tanba ne’e, haree ba situasaun hirak ne’e, mak Sekretaria Estadu ba Asuntu Kombatente no Libertasaun Nasionál hakarak halo alterasaun para bele fó igualdade tratamentu.

 Jornalista: Julia Chatarina

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here