Deputy Sekretáriu Jerál Federasaun Futeból Timor -Leste (FFTL), Frederico Martins (klaran), Diretór Verifikasaun no Lisensa Liga Futeból Amadora (LFA), José Carvalho (loos) no Prezidente Komérsiu no Venda LFA , Janio Tilman (karuk), ko’alia ba jornalista sira liuhusi konferénsia imprensa iha edifísiu LFA, Bairru Formosa, Dili, ohin. Imajen Tatoli/Hortençio Sanchez

DILI, 2 jullu 2019 (TATOLI)—Timor-Leste durante tinan haat (4) ona realiza Liga Amadora maibé tuir kritéria Asian Football Confederation (AFC- sigla inglés) klube ne’ebé joga iha Liga Primeira Divizaun obrigatóriu tenke iha klube juvenil U-16.

Tanba ne’e, Federasaun Futeból Timor-Leste (FFTL) hamutuk ho Liga Futeból Amadora (LFA) dadaun ne’e loke inskrisaun ba klube ualu (8) ne’ebé hamahon-án hela iha Primeira Divizaun.

“Desizaun foti hamutuk hosi Diresaun Tékniku Federasaun Futeból Timor-Leste (FFTL) no Liga Futeból Amadora (LFA), ita atu loke inskrisaun foun ba Liga Juvenil U-16. Inskrisaun loke hahú aban 1 jullu tinan ida ne’e iha edifísiu LFA,” tenik Deputy Sekretáriu Jerál FFTL, Frederico Martins liuhosi konferénsia imprensa ne’ebé hala’o iha salaun Xanana Sport Center, Bairru Formosa, ohin.

Iha fatin hanesan, Diretór Verifikasaun no Lisensa LFA, José Carvalho reforsa, serbisu ne’ebé FFTL no LFA hala’o hamutuk foin dala uluk iha Timor-Leste.

“Serbisu ne’ebé mak parte rua halo hanoin ida ne’e pasu di’ak ida tanba futeból la’ós ba de’it idade boot maibé ba mós idade ki’ik sira, nune’e iha fulan hirak liu-ba ami halo serbisu maka’as tebes halo koperasaun ne’ebé di’ak ho FFTL,” tenik José.

Nia akresenta, Liga Juvenil parte ida mós atu reforsa ekipa Selesaun Nasionál nian iha futuru. Kritéria ne’ebé klube sira atu kompleta ba ekipa juvenil la’ós foun maibé tuir de’it kritéria hirak ne’ebé antes ne’e klube sira submete ona.

“Kritéria ba jogadór juvenil hirak ne’e laduun todan tanba jogadór sira ne’e mai laiha kontratu. Jogadór sira ho de’it akordu entre klube no sira nia inan-aman,” José esplika.

Nia informa, Liga Juvenil ne’e loke dala mós ba sidadaun estranjeiru hirak ne’ebé hela iha Timor- Leste bele partisipa. “Kritéria ba jogadór estranjeiru sira ne’ebé hakarak partisipa, maka hanesan inan-aman tenke hela parmanente iha Timor ka destakadu serbisu iha ne’e no bele submete sira-nia dokumentu hanesan deklarasaun inan-aman nian ho klube,” Jose subliña.

Jornalista: Hortençio Sanchez

Editór: Xisto Freitas

1 KOMENTÁRIU

  1. Brigado ba inisiativa, atu husu lolos deit katak centru sira nebe hamahon an iha SEJD KA SEKERTARIO ESTADU JOVENTUDE NO DESPORTU bele tuir ka partisipa iha eventu ba U-16 ka lae?? Ami hein maun sira nia resposta.

HAKEREK NO HATÁN

Please enter your comment!
Please enter your name here