Prezidente Komisaun B, Adérito Hugo da Costa. Imajen Tatoli/Egas Cristovão

DILI, 2 jullu 2019 (TATOLI)—Prezidente Komisaun B Parlamentu Nasionál ne’ebé trata asuntu Negósiu Estranjeiru no Defeza Seguransa, Adérito Hugo da Costa hateten la fásil Parlamentu Nasionál atu halo akordu extradisaun ho nasaun sira hanesan Indonézia no nasaun sira seluk.

Tanba atu halo akordu refere, tuir nia, tenke mai hosi vontade nasaun sira nune’e mak foin halo akordu extradisaun no tenke haree regulamentu hosi nasaun ne’ebé atu estabelese akordu extradisaun.

 “Kestaun akordu extradisaun ne’e la’ós buat ida fásil para atu halo. Ne’e depende ba ida-idak nin vontade,” nia dehan ba jornalista TATOLI hafoin sesaun plenária iha Parlamentu Nasionál, tersa (2/7).

Hugo dehan presiza liuhosi negosiasaun sira, tanba ne’e regra ne’ebé universál ne’ebé mak regula nasaun rua atu halo akordu extradisaun.

“Portantu ita kontinua buka hela posibilidade atu iha akordu extradisaun,” Adérito Hugo informa.

Relasiona kazu timoroan na’in-rua ne’ebé mak dadaun ne’ebé hosi parte autoridade seguransa Indonézia kaputura tanba deskonfia lori drogra, Hugo hateten ne’e refleta ba situasaun atuál tan ne’e presiza hadi’a buat balun.

 “Presiza hadi’a jestaun fronteira, para bele deteta atividade sira ne’ebé utrapasa iha ita-nia fronteira terrestre no mós iha iha tasi ninian,” katak nia.

Nia haktuir, dadaun ne’e iha misaun estadu nian iha rai li’ur hanesan misaun diplomátika iha Indonézia no konsuladu ne’ebé atu halo akompañamentu ba prosesu iha juridisaun iha Indonézia ninian.

“Akompaña ba haree se estadu presiza halo asisténsia legál para bele halo akompañamentu legál ba sidadaun na’in rua. Tanba ne’e regra. Tanba kazu ne’e akontese iha nasaun seluk,” nia esklarese.

Jornalista Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here