iklan

NASIONÁL, DILI

Difikuldade Ne’ebé Klínika Bairru Pité Infrenta Seidauk Hetan Solusaun

Difikuldade Ne’ebé Klínika Bairru Pité Infrenta Seidauk Hetan Solusaun

dr. Daniel Murphy bainhira halo konsulta médika ba pasiente iha Klínika Bairro Pité. Foto google

DILI, 1 jullu 2019 (TATOLI)—Diretór Klínika Bairru Pité, dr. Daniel Murphy, hateten difikuldade ne’ebé Klínika Bairru Pité infrenta to’o ohin loron seidauk hetan solusaun.

Nia haktuir, semana hirak liu-ba iha setór privadu ida maka ajuda klínika refere ho orsamentu montante $20.000, maibé klínika ne’e atu la’o ho di’ak presiza orsamentu $50.000 iha kada fulan.

“Funsionáriu sira ne’ebé serbisu iha Klínika Bairru Pité, nia familia hamlaha no laiha osan ba transporte. Governu promete ona maibé seidauk fó ajudu,” dr. Daniel ba Agência Tatoli iha nia kna’ar fatin, Bairru Pité, Dili, ohin.

Daniel informa, sira hili dalan atu taka klínika maibé ida ne’e viola direitu fundamentál komunidade atu asesu ba saúde gratuita.

“Ema ne’ebé moras ami sempre atende ho di’ak maibe difísil bainhira osan laiha. Ami hili dalan ne’e tenki taka klínika ne’e rasik tanba ema mate barak ona. Karik ema iha osan selu, maibé tuir ha’u nia haree ema ki’ak ne’e labele selu tanba saúde ne’e kestaun direitu fundamentál ba ema hotu. Entaun, ami la gosta ideia ne’ebé tenki selu,” nia subliña.

Médiku seniór ne’e esplika volume ba atendimentu iha Klínika Bairru Pité la’o di’ak tebes. Lor-loron, nia tenik, sira iha milagre ida katak ema ne’ebé moras todan bele di’ak no ida ne’e halo sira kontente.

Entretantu, médiku no funsionáriu sira ne’ebé hala’o kna’ar iha Klínika Bairru Pité ne’e hamutuk ema atus-ida (100).

Jornalista: Felicidade ximenes

Editór: Xisto Freitas

 Lee mós notísia hirak tuir mai… http://www.tatoli.tl/2019/05/klinika-bairru-pite-enfrenta-krize-finanseira/

http://www.tatoli.tl/2019/06/fulan-lima-funsionariu-klinika-bairru-pite-la-simu-salariu/

http://www.tatoli.tl/2019/06/zonize-apoiu-20-000-ba-klinika-bairru-pite/

http://www.tatoli.tl/2018/04/governu-seidauk-responde-hodi-apoiu-klinika-bairru-pite/

 

iklan
iklan

Leave a Reply

iklan
error: Content is protected !!