Treinadór U-18, Andi Susanto

DILI, 01 jullu 2019 (TATOLI)—Tinan ida ne’e, Timor-Leste hetan oportunidade atu partisipa iha jogu internasionál ASEAN Football Federation (AFF) ne’ebé sei realiza iha Vietname.

Iha jogu ne’e, Timor -Leste tama iha Grupu A hamutuk ho Indonézia, Brunei Darussalam, Myanmar, Laos no Filipina. Dadaun ne’e, ekipa Timor -Leste lidera hosi treinadór ho nasionalidade Indonézia, Andi Susanto, iha ne’ebé kada loron treinadór refere sempre fó treinamentu ba jogadór sira iha Kampu Demokrasia, Bairru Formosa, Dili.

“Agora ha’u hetan fiar hosi Federasaun Futeból Timor-Leste (FFTL) hodi kaer selesaun nasionál U-18. Preparasaun ami nian hahú iha fulan hirak liu-ba kotuk to’o ohin loron atinje ona %80,” tenik Andi ba jornalista iha edifísiu Federasaun Futeból Timor -Leste (FFTL), ohin.

Eis treinadór klube Atlético Ultramar ne’e hatutan katak durante treinu iha ona jogadór seniór hamutuk 11 mai hamutuk ho jogadór juniór ne’ebé iha performa di’ak tebes. Jogadór seniór hirak ne’e balun joga iha Liga Futeból Amadora (LFA), maibé sira nia idade balun moris iha tinan 2001 no 2002.

Tuir oráriu jogu, Timor-Leste sei joga dahuluk kontra Brunei Darusalam iha 5 agustu 2019 no 7 agostu sei kontra Indonézia. Aleinde ne’e, jogadór klube Malaga España, Cornelis Nahak Portela “Aquilis” mós sei partisipa iha jogu refere maski nia féria fulan ida de’it iha Timor -Leste.

“Maski ha’u féria iha Timor fulan ida de’it, maibé ha’u nia ekipa nasionál fulan oin atu ba joga iha AFF, ha’u foti desizaun katak ha’u sei reforsa lai Timor-Leste tanba ne’e ha’u nia nasaun. Ne’e ha’u-nia raan. Ha’u sei ko’alia ho ha’u nia jestór nune’e bele prolonga lai ha’u nia féria ne’e to’o jogu AFF ramata,” tenik Aquilis.

Entretantu, tuir féria ne’ebé Malaga fó ba Aquilis to’o de’it 21 jullu tenke fila hikas ba España nune’e bele hahú tuir treinamentu iha ne’ebá.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here