SEKOMS ho ekipa delegasaun hasoru malu ho Konsellu Administrasaun Lusa, Sesta (28/6/2019). Imajen/Rafy Belo

LISBOA, 28 juñu 2019 (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” hamutuk ho Prezidente Konsellu Administrasaun RTTL.EP (Rádiu no Televizaun Timor-Leste), Francisco da Silva Gari, Prezidente Ajénsia TATOLI.IP-Ajénsia Informasaun Ofisiál Estadu Timor-Leste, José da Costa, Vise Olandino da Costa, Xefe Gabinete SEKOMS, Júlio Gonçalves, inklui asesór realiza vizita traballu ba CENJOR (Centro Protocolár de Formasaun Profisionál Para Jornalistas) no Ajénsia Lusa.

Iha vizita ba CENJOR, SEKOMS hasoru malu ho Diretora CENJOR, Deolinda Almeida ho nia organigrama no ho Lusa hasoru malu ho Konsellu Administrativu Lusa nian ne’ebé lidera husi nia Prezidente Nicolau Santos hodi ko’alia posibilidade kooperasaun iha prezente no mós futuru.

“Prezidente TATOLI no Lusa diskute futuru kooperasaun, kooperasaun em termos de troka notísia, konteúdu informasaun entre ita (Timor-Leste) ho Portugal,” informa Sekretáriu Estadu Merício Juvinal dos Reis “Akara” ba jornalista sira, iha edifísiu Ajénsia Lusa, Lisboa, Portugal.

Governante ne’e rekoñese katak enkontru entre TATOLI no Lusa ne’e produtivu tebes. “Importante entre Ajénsia TATOLI no Lusa no mós entre Timor-Leste no Portugal”.

Iha biban hanesan, Sekretáriu Estadu Komunikasaun Sosiál, Mericio Juvinal dos Reis “Akara” perante mídia sira akresenta, ba oin, Prezidente TATOLI.IP, José da Costa ho Prezidente Lusa kontinua diskute akordu maizumenus iha área formasaun ba jornalista, depois interkámbiu entre jornalista. “Hafoin ita bele diskute konteúdu, troka notísia sira ba malu. Importante liu mak formasaun ba jornalista sira”.

Sekretáriu Estadu mós dehan,  formasaun ne’e jornalista TATOLI bele mai iha Lusa ka bele konvida mós jornalista seniór sira husi Lusa ba iha Timór hodi kontribui ideia inklui tékniku sira ligadu ho área jornalizmu nian.

Iha fatin hanesan, Prezidente Konsellu Administrasaun Lusa, Nicolau Santos, ba mídia sira haktuir katak, Lusa  hakarak serbisu hamutuk ho Ajénsia TATOLI.IP maske nune’e hein akordu iha kurtu prazu atu bele konkretiza liután serbisu hamutuk entre ajénsia notisioza rua ne’e.

“Ba ida ne’e, ba ita buat ne’ebé provavelmente disponibiliza iha kurtu prazu mak servisu inglés; Lusa news, tanba sira (Ajénsia TATOLI.IP) momentu ne’e iha online transmite iha língua tolu, portugés, tetun no inglés maibé agora sei transmite ho tetun. Agora hakarak transmite presizamente iha portugés no inglés, seguramente nu’udar pasu primeiru”.

“Pasu tuir será ba Timór jornalista Lusa nian ka jornalista TATOLI nian iha Portugal ba formasaun atu dezenvolve serbisu hamutuk,” hateten prezidente Lusa ne’e.

Nia konsidera Ajénsia Lusa nu’udar ajénsia antiga ida iha Timor-Leste no país seluk ne’ebé mak ko’alia portugés tuir programa kontratu Ajénsia Lusa nian ho estadu portugés tanba ne’e delegasaun ajénsia ne’e atu mantén.

“Korrespondénsia iha Timor-Leste, halo traballu ida ne’ebé mak exelente no fó kolaborasaun, presizamente Ajénsia TATOLI iha apoiu ba matéria formasaun; oinsá bele halo, bele serbisu no disponivel ba ida ne’e. Portantu, Ajénsia Lusa iha Timor-Leste ne’e atu kontinua, la’ós atu hotu maibé atu nia atuasaun alargadu liután iha kuadru kolaborasaun ne’ebé mak ita sei hakerek,” konklui Prezidente Nicolau Santos.

Durante enkontru, Prezidente TATOLI.IP, José da Costa informa no introdús ba Konsellu Administrasaun Lusa nian kona-ba natureza no prosesu estabelesimentu Ajénsia TATOLI.IP refleta ba vizaun TATOLI nian katak sai “trend setter” fontes notísia no informasaun nasionál ne’ebé iha kualidade, kredivel no nesesitadu husi públiku utilizadór informasaun (vizaun).

Nune’e mós ho misaun katak  fornese produtu notísia ne’ebé mak públiku utilizadór informasaun jerálmente presiza, atende informasaun públiku utilizadór informasaun ho karakter antesedente, indepth, klasifikadu “taylor made information”, no “self user assignment”, sai produtór no jestór informasaun no dokumentasaun nasaun, sai produtór filme no dokumentasaun nasaun, sai organizadora funsaun “information clearing house”.

Inklui, sai órgaun opiniaun públiku, hala’o funsaun instituisaun peskiza no dezenvolvimentu aplikada, sai “state public relations”, “state agent of information”, “flag carrier” Timor-Leste nian no realizadór forum informasaun públiku.

Tuir Prezidente TATOLI.IP, ne’ebé mak simu pose iha 21 agostu 2018 husi SEKOMS ne’e katak hafoin lansamentu ajénsia ne’e iha loron 27 jullu 2016 to’o ohin loron sei nafatin nu’udar embriaun no seidauk kompletamente nu’udar Institutu Públiku (IP) ida haree ba organizasaun no redasaun.

Tanba ne’e, atu kompleta, oras ne’e TATOLI buka konsolida aan institusionalmente sai instituisaun profisionál hakarak halo aproximasaun ba instituisaun relevante sira, inklui CENJOR no Lusa, haree ba jestaun no investimentu ba rekursu umanu atu bele iha kualidade no kompetente hodi hala’o kna’ar tuir padraun ajénsia nian ho karakter multikanál, multimedia, multiplataforma no multitarefa ba interese estadu no públiku nian.

Durante vizita traballu SEKOMS ho ekipa ba CENJOR no Lusa, tuir observasaun jornalista TATOLI nian katak iha interasaun ne’ebé efetivu no amigavél eh simpátiku no nakonu ho amizade entre ezekutivu no funsionáriu sira husi organizasaun rua ne’e bainhira partilla esperiénsia no koñesimentu ba malu iha sorumutuk ho SEKOMS no nia ekipa.

Bainhira vizita iha fatin rua ne’e, ezekutivu CENJOR no Lusa lori SEKOMS ho ekipa ba observa direta laboratóriu, studio, funsionamentu serbisu iha organizasaun sira ne’e no organizasaun sira ne’e demostra vontade no kompromete apoiu alende Ajénsia TATOLI.IP inklui RTTL.EP eh instituisaun mídia timoroan sira ka seluk tan bainhira presiza.

Istórikamente, Lusa hahú fó sai notísia 1987. Lusa ne’e nu’udar únika multinasionál portugeza informasaun.

Lusa eziste iha territóriu tomak Portugal no nasaun sira ho lian portugés no zona sira iha mundu ho komunidade luzófona signifikativa ka ho relevánsia notisioza.

Lusa asegura informasaun rápida, faktuál, inzenta no rigoroza. Lusa distribui loroloron ba nia kliente sira notísia atus iha testu, foto, audio no video kona-ba akontesimentu sira iha Portugal no mundu. Enkuantu, CENJOR nu’udar Sentru Formasaun Profisionál ba jornalista sira, ne’ebe kria liuhusi

Portaria n.º 667/86,  7  novembru no rezulta protokolu ida selebradu entre Instituto do Emprego e Formação Profissional (IEFP), Direção-Geral da Comunicação Social,  Sindicato dos Jornalistas, Associação de Imprensa Diária no Associação da Imprensa Não Diária (atual Associação Portuguesa de Imprensa – API).

CENJOR oferese tipu formasaun iha área jornalizmu oioin, ne’ebé mak timoroan sira mós hola parte inkluzivamente jornalista RTTL.EP no Ajénsia TATOLI.IP rasik, iha prosesu embriaun TATOLI nian.

Notísia relevante:  http://www.tatoli.tl/2019/06/sekoms-mk-portugal-koalia-parseria-serbisu-iha-area-komunikasaun-sosial/

Jornalista      : Rafy Belo

Editór              : Francisco Simões

HAKEREK NO HATÁN

Please enter your comment!
Please enter your name here