Primeiru-Ministru, Taur Matan Ruak. Imajen/Egas Cristovão

DILI, 27 juñu 2019 (TATOLI) – Primeiru-Ministru (PM), Taur Matan Ruak hateten, prioridade Governu iha infrastrutura ida mak Aeroportu Dili tanba ne’e nia hakarak Aeroportu Internasionál Prezidente Nicolau Lobato tenke di’ak liu Aeroportu Internasionál Rota do Sândalo iha Rejiaun Administrativu Espesiál Oe-cusse Ambeno (RAEOA).

“Ha’u hanoin katak ita bele hadi’a ita-nia aeroportu. Hodi bainhira Embaxada Japaun fó dezeñu ida, ha’u haree Aeroportu Díli simples demais. Ha’u hakarak di’ak liu Oe-cusse”, dehan Primeiru-Ministru iha Sesaun Traballu Jornada Orsamentál iha Salaun Ministériu Finansa, kinta ne’e.

Tuir Xefe Governu, bainhira orsamentu ne’ebé Governu Japaun fó la to’o, Governu Timor-Leste bele aumenta hodi halo Aeroportu Dili.

“Ita-boot sira-nia osan la to’o, ami bele investe mas labele hanesan ne’e. Ha’u hanesan Primeiru-Ministru la-aseita, ha’u-nia Diretór sira de’it la-aseita sá tan ha’u nu’udar Primeiru-Ministru,” tenik xefe governu.

Entretantu, orsamentu ne’ebé Governu Japaun atu ajuda hodi konstrui Aeroportu Dili mak millaun $44, no tuir informasaun Konstrusaun Aeroportu Internasionál ne’e sei hahú iha marsu 2020 no obra ne’e sei la’o durante fulan 20 nia laran, hafoin entrega ba Governu Timor-Leste.

Maske nune’e, to’o agora seidauk iha akordu formál entre Governu Timor-Leste no Governu Japaun.

Konstrusaun ne’e sei kobre komponente lima hanesan terminál pasajeiru, torre kontrolu, upfront, tax way no para fatin ba aviaun.

Jornalisata: Julia Chatarina

Editór: Rafy Belo

Notísia Relevante:

http://www.tatoli.tl/2019/05/japaun-hakarak-konkordansia-formal-ho-tl-kona-ba-konstrusaun-aeroportu/

HAKEREK NO HATÁN

Please enter your comment!
Please enter your name here