DILI, 27 juñu 2019 (TATOLI)—Dadus ne’ebé Mídia LFA fó sai ohin, jogadór hamutuk ema na’in 83 mak hetan kartaun kinur no na’in 6 hetan kartaun mean durante jogu Segunda Divizaun Liga Futeból Amadora (LFA) époka 2019 ne’ebé hala’o durante fulan tolu nia laran.
Totál golu ne’ebé jogadór sira prodúz iha fulan tolu ne’e hamutuk 120. Enkuantu, jogu ne’e mós hahoris mellór markadór ida no sai mellór markadór ne’e maka jogadór Nélson Freitas hosi Aitana FC ho totál golu 10.
Klube ne’ebé hamahan iha Segunda Divizaun hamutuk 12 hanesan Kablaki FC, FIEL FC, Aitana FC, Lika-Lika Lemorai FC, Santa Cruz FC, Zebra FC, Sporting Clube de Timor, DIT FC, Porto Taibessi FC, Nagardjo FC, Cacusan FC no FC Lero.
Entre klube 12 ne’e, DIT no Aitana mak konsege hetan billete ba Primeira Divizaun no klube rua seluk, Cacusan no Lero, obrigadu tenke tuun ba Terseira Divizaun.
