Ministru Justisa, Manuel Cárceres da Costa. Imajen/Egas Cristovão

DILI, 26 juñu 2019 (TATOLI)Ministru Justisa, Manuel Cárceres da Costa, informa tempu to’o ona Timor-Leste harii Supremu Tribunál Justisa (STJ), nune’e sidadaun hotu bele satisfeitu ho desizaun.

“To’o ona tempu ita hanoin atu institusionaliza ita-nia Supremu Tribunál Justisa. Ne’e hanesan tribunál aas liu ona iha nasaun ida,” Cárceres ko’alia ba jornalista sira hafoin reuniaun Konsellu Ministru, iha Palásiu Governu, ohin.

Nia esplika, tarefa no funsaun STJ mak hanesan haree ba prosesu justisa iha rai laran, halo supervizaun, regula, akonsellamentu no halo funsaun hanesan administrativa.

Nia hatutan, funsaun Supremu Tribunál Justisa mós enkarrega hodi  promove uniformidade iha aplikasaun lei, nunee  lei hotu-hotu no regulamentu sira iha nasaun Repúblika Demokrátika Timor-Leste (RDTL) aplika ho forma justa no korretamente.

Ministru Justisa ne’e haktuir, dala barak sidadaun sira to’o Tribunál Rekursu mós seidauk satisfeitu nafatin ho akordaun ne’ebé Tribunál Distritál ho Tribunál Rekursu hasai, tanba ne’e tempu to’o ona harii Supremu Tribunál ba Justisa.

Cárceres salienta, oras ne’e Timor-Leste iha de’it Tribunál Primeira Instánsia ho Tribunál Distritál sira ho tan Tribunál Rekursu.

“Depois tenke haree mós Tribunál Kontas. Agora ita iha Kámara Kontas de’it  ne’ebé hamutuk hela ho Tribunál Rekursu. Hafoin ne’e, haree mós Tribunál Administrativa para depois sidadaun sira kesar membru governu, funsionáriu públiku, Tribunál Administrativa mak bele rezolve. Se lae, bohu hamutuk de’it, entaun asuntu potensiozu sira tama hotu, ita-nia prokuradór ho juíz sira mós menus tebes, rezulta asuntu sira pendente barak,” nia subliña.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here