DILI, 26 juñu 2019 (TATOLI) – Governu liu-hosi Ministériu Finansa (MF) iha loron 27 juñu, sei realiza sesaun traballu kona-ba Jornada Orsamentál ba Orsamentu Jerál Estadu (OJE) 2020, nu’udar faze inísiu ba preparasaun orsamentu ba kada tinan, hodi bele diskute prioridade ne’ebé hola reflesaun hosi Planu estratéjiku Dezenvolvimentu (PED) no Programa VIII Governu ba tinan lima ba oin.

Tuir nota ne’ebé Agência TATOLI asesu husi MF, sesaun ne’e sei diskute kona-ba Senáriu ba Tetu Fiskal OJE 2020 nian nune’e bele hatan nesesidade komún liu-hosi programa no atividade setorál iha Ministériu no Instituisaun sira hotu.

Durante sesaun traballu ne’e, MF, Gabinete Primeiru Ministru (GPM) no Banco Central Timor Leste (BNCTL) sei hala’o aprezentasaun materia haat hanesan Diretiva no objetivu Dezenvolvimentu Nasionál, Avaliasaun ba Dezempeñu Dezenvolvimentu Sosiál, Avaliasaun ba Dezempeñu Dezenvolvimentu Ekonómiku, no Enkuadramentu Fiskál no Fatór determinante sira ba definisaun Tetu Fiskál.

Iha enkuadramentu fiskál sei aprezenta mós Kapasidade Ezekusaun tinan 5 hahú hosi 2014 to’o 2019, Balansu no Reseita Fundu Petrolíferu no dezempeñu investimentu, Enkuadramentu no Polítika emprestimu, Komitmentu Fundu Externa, no Senáriu Tetu Fiskál 2020 nian.

Jornada Orsamentál konklui ho apresiasaun ba Prioridades hosi Programa sira ne’ebé sei konsidera iha ámbitu OJE 2020 no Tetu Fiskal adekuada hodi bele responde prioridade sira hodi kontinua asegura dezenvolvimentu nasionál iha Timor-Leste.

Prioridade no Tetu Fiskál sei kontinua aprezenta ba Konsellu-Ministru atu bele aprova nune’e bele gia MF atu halo disagregasaun Pakote Fiskal ba Ministériu, Instituisaun Estadu no Ajensia Autonoma sira.

Seremónia ne’e sei partisipa husi Membru Governu VIII Governu Konstitusionál, Membru Parlamentu Nasionál hosi Komisaun C ne’ebé trata asuntu Finansa Públika, Dirijente Instituisaun Estadu no Ajénsia Autonóma sira, Prezidente no Administradór Munisípiu sira inklui reprezentante hosi RAEOA – ZEESM no Diretur Jerál no Diretór Nasionál ne’ebé responsável ba área Planeamentu no Orsamentu nian.

Tuir kelendáriu husi Governu, Jornada Orsamentál sei realiza iha 27 no 28 juñu.

Mezmu iha ona orientasaun hodi prepara ona proposta ba kada instituisaun Estadu maibé tetu fiskál foin determina hafoin Jornada Orsamentál.

Nune’e Proposta OJE finál sei aprezenta iha Konsellu Ministru iha loron 10 jullu no sei diskute no aprovasaun ikus ezekutivu sira iha loron 18 setembru.

Hafoin iha loron 15 outubru 2019, Governu sei manda Proposta OJE 2020 ba Parlamentu Nasionál hodi bele diskute no aprova iha dezembru 2019.

Antes ne’e, Governu halo ona retiru durante loron rua hodi define prioridade jerál VIII Governu Konstitusionál.

Iha tinan 2018, Governu liu-hosi Jornada Orsamentál aprova tetu fiskál másimu OJE 2019 hamutuk biliaun $1,35.

Hafoin veta, Prezidente Repúblika simu reapresiasaun OJE 2019 hosi Parlamentu Nasionál iha 1 Fevereiru 2019 ho montante biliaun $1,482 hosi proposta inísiu biliaun $2,1 no iha reapresiasaun ba OJE ne’e, hasai orsamentu ho montante millaun $650 ho razaun katak alokasaun ne’e kontempla ona iha Lei Atividade Petrolíferu (LAP).

Ikus mai, hafoin veta Proposta Lei OJE Governu, Prezidente Repúblika promulga Lei OJE 2020 ho montante biliaun $1,482.

Jornalista: Julia Chatarina

Editór.     : Rafy Belo

HAKEREK NO HATÁN

Please enter your comment!
Please enter your name here