Ministru Estadu Prezidénsia Konsellu Ministru, Hermenegildo Augusto Cabral Pereira. Imajen Tatoli/Egas Cristóvão.

DILI, 26 juñu 2019 (TATOLI)Ministru Reforma Lejizlativa no Asuntu Parlamentár, Fidelis Manuel Leite Magalhães aprezenta Proposta Minuta Protokolu Kooperasaun Triangulár entre Sekretaria Estadu Komunikasaun Sosiál (SEKOMS), Instituto Camões no Ministériu Relasaun Externu no Kultu Argentina, liuhosi implementasaun projetu Consultório da Língua para Jornalista (CLJ).

Ministru Estadu Prezidénsia Konsellu Ministru, Hermenegildo Augusto Cabral Pereira hateten Konsellu Ministru aprova Proposta Minuta ne’e hodi fó poder tomak ba Sekretáriu Estadu Komunikasaun Sosiál, Merício Juvenal dos Reis “Akara”, hodi asina Protokolu Kooperasaun, nu’udar parte hosi Governu Timor-Leste.

“Protokolu Kooperasaun Triangulár, hosi parte Portugal, Instituto Camões mak  reprezenta, Timor-Leste hosi Sekretaria Estadu Komunikasaun Sosiál (SEKOMS) iha Ministériu Reforma Lejizlativa no Asuntu Parlamentár (MRLAP) nia laran, atu implementa programa formasaun lian portugés ba jornalista sira hamutuk ema na’in 30 mak sei benefísia ba programa ne’e,” nia informa hafoin reuniaun ezekutivu iha Palásiu Governu, Dili, kuarta ne’e.

Governnate ne’e hatutan, ida ne’e hanesan programa importante atu alkansa rezultadu di’ak ba timoroan sira ne’ebé asumi kna’ar nu’udar jornalista.

Formasaun ne’e sei involve profisionál komunikasaun sosiál hosi Portugal no Argentina hodi fahe koñesimentu ba jornalista iha mídia nasionál hanesan  rádiu, televizaun, mídia emprimi no eletróniku sira.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here