Prezidente Institutu Politékniku Betano (IPB), Acácio Cardoso Amaral (loos) no Ministru Ensinu Superiór, Siénsia no Kultura, Longuinhos dos Santos (klaran), Diretór Nasionál CNFEP Tibar, Simão Tito Barreto (karuk) asina memorandu entendimentu no akordu parseria entre IPB no CNFEP, iha eis edifísiu Alfándega, Kolmera, Dili, kuarta (26/06/2019). Imajen Tatoli/Egas Cristóvão

DILI, 26 juñu 2019 (TATOLI)—Institutu Politékniku Betano (IPB)-Kay Rala Xanana Gusmão  ho  Sentru Nasionál Empregu no Formasaun Profisionál (CNEFP-sigla portugés) Tibar asina nota entendimentu ho akordu parseria.

Akordu ne’e iha oin rua, ida, nota entendimentu entre IPB ho CNEFP hanesan sumbriña no ida seluk kona-ba akordu  parseria entre  CNEFP ho IPB hanesan akordu tékniku.

Asina akordu ne’e realiza iha loron kuarta (26/7/2019) iha salaun Ministériu Ensiñu Superiór, Siénsia no Kultura (MESSK), Kolmera, Dili.

Akordu rua ne’e asina hosi Prezidente IPB, Acácio Cardoso Amaral ho Diretór CNEFP Tibar, Simão Tito Barreto, no Ministru Ensiñu Superiór, Siénsia no Kultura, Longuinhos dos Santos, sai hanesan sasin ba akordu ne’e.

Nota entendimentu iha finalidade 6, hanesan realiza peskiza konjunta entre CNEFP ho IPB, intekámbiu, promove ezekusaun no divulgasaun estudu, realiza semináriu, kongresu, eventu akadémiku no sientífiku, fasilita kondisaun ba interkámbiu periódika, estudu no rezultadu traballu sientífiku, nesesidade  dezenvolvimentu iha peskiza konjuntu no ikus liu hasa’e kapasitasaun rekursu umanu ba prosesu dezenvolvimentu.

Purtantu, akordu parseria ka akordu tékniku ne’e, sita katak iha futuru atu prolonga kooperasaun la presiza ona ministru, maibé presiza de’it dirijente entre IPD ho CNEFP. Objetivu seluk hosi akordu tékniku ne’e, mak tulun estudante kontrusaun sivíl hosi IPB bele prátika iha Sentru Formasaun Tibar.

Iha biban ne’e, Ministru Ensiñu Superiór, Siénsia no Kultura, Longuinhos dos Santos, informa asinatura akordu ne’e importante tebes, tanba atu orienta estudante sira ba merkadu traballu.

“Memorandu entendimentu ida ne’e importante, tanba Sentru Formasaun Tibar bele fasilita prátika ba estudante sira hosi IPB, tanba IPB laiha fasilidade ba prátika. Liga ba tékniku ne’e prátika tenke barak,” dehan Longuinhos.

Iha fatin hanesan, Prezidente IPB, Acácio Cardoso Amaral, haktuir  IPB hanesan instituisaun foun sei falta fasilidade barak, liliu laboratóriu no ekipamentu laboratóriu ba kontrusaun sivíl nian no produsaun animál.

Asina akordu ne’e ba daruak ona. Akordu dahuluk asina iha 28 setembru 2018, estudante IPB na’in 59 mak ba halo prátika iha Sentru Formasaun Tibar. Akordu daruak ne’e estudante na’in 37 mak sei ba halo prátika iha Sentru Formasaun Tibar. Estudante hirak ne’e maioria hosi konstrusaun sivíl.

“Ami fiar ho kooperasaun ida ne’e sei hakbiit liu-tan IPB tanba atribuisaun ida hosi CNEFP. Ohin loron ita marka tan istória ida, IPB sina MoU  ho CNEFP. Ami espera, liuhosi kooperasaun ida ne’e bele fasilita IPB atu alkansa nia misaun no vizaun tuir estatutu IPB nian noele fasilita prátika ba estudante IPB iha Eskola Superiór Enjeñaria (ESE) iha área konstrusaun sivíl,” tenik Prezidente IPB.

Iha sorin seluk, Diretór Sentru Nasionál Empregu no Formasaun Profisionál (CNEFP-sigla portugés) Tibar, Simão Tito Barreto, hateten nia parte prontu simu estudante 37 ne’e hodi prátika iha sentru formasaun refere.

“Akordu segundu ne’e haree liu-ba konstrusaun sivíl nian. Primeira faze IPB haruka estudante 59. Segunda faze haruka 37 mai sentru. Nune’e, ba futuru ita-nia joven sira ne’e bele involve iha projetu governu nian, tanba eskola téknika tenke domina iha prátika, liliu estudante sira iha konstrusaun jerál nian,” informa Simão.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here