Ministru Defeza no Ministru Interiór ein ezersísiu, Filomeno da Paixão de Jesus. Imajen/ \Egas Cristovão

DILI, 26 juñu 2019 (TATOLI)Ministru Defeza no Ministru Interiór Interinu, Filomeno da Paixão de Jesus, promete sei halo rotasaun ba pesoál polísia balun iha Servisu Migasaun (SM).

“Ha’u sei troka hotu polísia sira iha Migrasaun. Elementu sira iha ne’ebá tinan 10 ona. Demais ona. Tan ne’e, ha’u hakarak troka. Labele hanesan uma-lisan iha ne’ebá hodi hela kle’ur. Maibé, ida ne’e Funsaun Públiku tenke ajuda ha’u. Agora ita hakarak sira mai ne’e, tinan-rua fila ka tinan-ida fila (rotasaun),” Filomeno ko’alia ba jornalista sira hafoin reuniaun Konsellu Ministru, iha Palásiu Governu, ohin.

Ministru Defeza ne’e hateten, presiza troka duni polísia sira iha Servisu Migrasaun liliu pesoál sira aeruportu, fronteira no portu. Razaun halo rotasaun, tanba Ministru Defeza no Interior Interinu ne’e identifika anomalias barak no balun prosesa ba Komisaun Antí Korrupsaun (KAK).

“Fundamentu mak ne’e de’it, ita labele serbisu tinan ba tinan nafatin amen iha ne’ebá,” governante ne’e argumenta.

Filomeno hatutan, iha Servisu Migrasaun iha mós funsionáriu públiku, tanba ne’e sei halo koordenasaun ho Komisaun Funsaun Públika (KFP) hodi solusiona problema ne’e.

Hatán ba pergunta, karik polísia sira iha Servisu Migrasaun iha fronteira sei entrega ba Komandu Polísia Nasionál Timor-Leste? “Lae. Polísia ne’e loloos uluk sira kuandu mai iha Migrasaun, sira pasa ba vida sivíl, maibé sira lakohi. Sira hakarak polísia nafatin, ne’e mak kontra lei ne’e,” governante ne’e hateten.

Ministru Paixão mós sei hola aparellu di’ak hodi monitoriza fatin hotu-hotu, liliu embaixada iha li’ur, iha Indonézia, Austrália ho Singapura, nune’e hetan autorizasaun prévia hafoin tama mai territóriu Timor-Leste nian. Aparellu hirak ne’e sei instala iha Batugade, Salele no aeruportu.

Jornalista: Evaristo Soares Martins

Editór: Xisto Freitas

Lee mós notísia ne’e: http://www.tatoli.tl/2019/06/mi-submete-ona-kazu-migrasaun-ba-kak/

HAKEREK NO HATÁN

Please enter your comment!
Please enter your name here