Ministru Defeza no Ministru Interino Seguransa, Filomino Paixao. Imajen/Antonio Goncalves

DILI, 25 juñu 2019 (TATOLI)–Ministru Interiór en-ezersísiu no atuál Ministru Defeza, Filomeno da Paixão de Jesus informa enkontru ohin ho Prezidente Repúblika, Francisco Guterres Lú Olo, koa’lia kona-ba atuasaun Migrasaun ne’ebé laduun tuir regra.

“Ohin ko’alia mós kona-ba atuasaun Migrasaun ne’ebé laduun tuir regra, to’o ha’u haruka halo Gabinete Inspesaun Interiór nian, tanba iha kobransa barak mak la-tuir regra. Iha kazu barak ha’u submete ona ba Komisaun Antí Korrupsaun (KAK) no kazu balun Inspesaun Jerál sei haree hela, maibé enkuantu ita-nia sistema ne’e manuál de’it la fásil,” nia tenik ba jornalista sira hafoin halo enkontru semanál ho Prezidente Repúblika, Francisco Guterres Lú-Oló, iha Palásiu Prezidente Nicolau Lobato, Bairru Pité, Dili, tersa ne’e.

Governante ne’e dehan, kazu ne’ebé Ministériu Interiór (MI) submete ona ba KAK mak relasiona hola karimbu hamutuk 32 (karimbu ida ho kustu $400).

Nune’e mós, nia akresenta, kazu balun mak billete ba viajen ho distánsia besik maibé ho presu aas (karun dala rua).

“Ida ne’e submete ona ba KAK. Ha’u agora ho KAK de’it mak ne’e. Ne’e mak di’ak tanba ha’u iha serbisu barak atu halo,” Filomeno realsa.

Nia dehan tan, agora Governu liu-hosi serbisu MI atu identifika iha ne’ebé mak iha infrasaun kobransa illegál.

“Kuandu ita-nia sistema monta hotu ona, internet monta hotu no iha CCTV (Closed Circuit Television) iha fatin hotu-hotu, entaun bainhira ema entrada (tama) hotu-hotu rejistadu iha sistema. Ida ne’e meiu ida atu eskapa kobransa illegál. Enkuantu hanesan ne’e, bele iha fuga,” eis Vise Xefe Estadu Maiór-Jenerál ne’e subliña.

Nia haktuir, iha enkontru ne’e, Xefe Estadu preokupa ho problema iha Migrasaun ne’e, tan ne’e husu MI tenke haree didi’ak serbisu Migrasaun.

“Ha’u dehan ba Prezidente Repúblika katak tinan ne’e osan tau ona no oras ne’e prosesu hela iha aprovizionamentu (procurement) MI nian ho objetivu atu halo sofistifikasaun (moderniza) ba ekipamentu internet no seluk tan, nune’e bele tau iha Mota-Ain no Aeruporto Comoro, atu ita labele iha eskapa iha taxa,” Filomeno esplika.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here