Prezidente Institutu Politékniku Betano (IPB), Acácio Cardoso Amaral (loos), Ministru Ensiñu Superiór, Siénsia no Kultura, Longuinhos dos Santos (klaran) no Reitór UNTL, Francisco Miguel Martins (karuk), asina nota entendimentu no akordu kooperasaun entre UNTL no IPB, iha eis edifísiu Alfándega, Kolmera, Dili, tersa (25/06/2019). Imajen Tatoli/Egas Cristóvão

DILI, 25 juñu 2019 (TATOLI) — Institutu Politékniku Betano (IPB) ho Universidade Nacional Timor Lorosa’e (UNTL), asina nota entendimentu no akordu kooperasaun, tersa ne’e, iha salaun Ministériu Ensiñu Superiór, Siénsia no Kultura (MESSK), Kolmera, Dili.

Akordu ne’e iha oin rua. Ida, nota entendimentu entre IPB ho UNTL hanesan sumbriña no ida seluk kona-ba akordu kooperasaun entre UNTL ho IPB hanesan akordu tékniku. Akordu rua ne’e asina hosi Prezidente IPB, Acácio Cardoso Amaral ho Reitór UNTL, Francisco Miguel Martins no sai sasin ba akordu ne’e mak Ministru Ensiñu Superiór, Siénsia no Kultura, Longuinhos dos Santos.

Nota entendimentu ne’e kontempla finalidade 6, hanesan realiza peskiza konjunta entre UNTL ho IPB, interkámbiu, promove ezekusaun no divulgasaun estudu, realiza semináriu, kongresu, eventu akadémiku no sientífiku, fasilita kondisaun ba interkámbiu periódika, estudu no rezultadu traballu sientífiku, nesesidade  dezenvolvimentu iha peskiza konjuntu no ikus liu hasa’e kapasitasaun rekursu umanu ba prosesu dezenvolvimentu.

Entretantu, akordu kooperasaun ho objetivu prepara formasaun téknika komplementár no prátika iha espesialidade oioin, hanesan área konstrusaun sivíl, siénsia no teknolojia ba estudante IPB sira.

Ministru Ensiñu Superiór, Siénsia no Kultura, Longuinhos dos Santos, informa asinatura akordu refere atu garante formasaun kualidade UNTL no mós bele fasilita prátika ba estudante IPB sira.

“Memorandu entendimentu ida ne’e hanesan pasu pozitivu, tanba fasilidade iha IPB mukit loos. Ho kooperasaun ida ne’e bele eleva estudante sira-nia kualidade, IPB ho UNTL halo ligasaun serbisu hamutuk, ligasaun mós ho instituisaun privadu sira hodi mellora liu-tan kualidade estudante sira iha prátika no peskiza,” dehan Longuinhos.

Iha fatin hanesan, Prezidente IPB, Acácio Cardoso Amaral, haktuir, iha inísiu, IPB hahú ho estudante 283 no to’o agora estudante iha 414.

“Ami fiar kooperasaun ida ne’e hakbiit liu-tan IPB tanba UNTL hanesan universidade ne’ebé tuan, nia Fakuldade Enjeñaria iha fasilidade ne’ebé di’ak liu. Ami espera liuhosi kooperasaun ida ne’e bele fasilita liu-tan IPB atu alkansa nia misaun no vizaun tuir estatutu IPB nian. Ami espera liuhosi kooperasaun ne’e bele fasilita prátika ba estudante IPB iha Eskola Superiór Enjeñaria (ESE) iha área konstrusaun sivíl,” tenik Acácio.

Hosi númeru estudante ne’e, Departamentu Produsaun Animál (PA) iha na’in 247—iha tinan 2017 na’in 116, tinan 2018 na’in 49, tinan 2019 na’in 82. Enkuantu, estudante hosi Konstrusaun Sivíl iha na’in 167—tinan 2017 iha na’in 59, tinan 2018 na’in 38 no tinan 2019 iha na’in 70.

Estrutura orgánika IPB kompostu hosi Konsellu Jerál, Prezidente Institutu (Reitór), Vise-Prezidente na’in-rua no Konsellu Sientífiku no Pedagójiku. Iha nível eskola superiór lidera hosi diretór ida, ne’ebé ekivalente ho Dekanu Fakuldade iha Universidade.

Oras ne’e, IPB iha staff administrasaun na’in-17 no dosente na’in-25, estrutura 3, Produsaun Animál iha na’in-ualu (8), destakadu na’in-tolu (3) no materiál jerál na’in-haat (4).

“Hanesan instituisaun foun, IPB sei falta fasilidade barak inklui laboratóriu no ekipamentu laboratóriu ba Konstrusaun Sivíl no Produsaun Animál. Tanba ne’e, ohin loron, ita hamutuk marka tan istória IPB nian liuhosi asinatura akordu entre IPB ho UNTL,” informa Acácio.

Sistema aprendijazen iha IPB, nia haktuir, aplika ano zero ba semestre 1 no 2, tinan akadémiku semestre 3 to’o 6. Karik estudante sira-nia IPK-Index Prestasi Kuliah ka Índise Dezempeñu Akadémiku la to’o 2.0, sira labele kontinua ba tinan akadémiku alias “DO-Drop Out’.

Kursu ne’ebé hala’o iha IPB bazeia ba estatutu mak hanesan Eskola Superiór Agronomia no Zootéknia (ESAZ) no Eskola Superiór Enjeñaria (ESE).

Iha Eskola Superiór Agronomia no Zootéknia (ESAZ) iha kursu Produsaun Animál no kursu sira seluk sei estabelese iha futuru hanesan saúde animál, prosesamentu alimentár, floresta no agronomia.

Iha Eskola Superiór Enjeñaria (ESE) nia okos kursu Konstrusaun Sivíl ne’ebé la’o ona no kursu seluk ne’ebé sei loke iha futuru mak hanesan IT (Informasaun Teknolojia), Mekánika no Eletrónika.

IPB mós halo kooperasaun ho rai-li’ur hanesan Institutu Politeknik Bali (PNB), Institutu Politékniku Bragança (IPB), Institutu Politékniku Porto (IPP) no Institutu Politékniku Santarem (IPS).

Sorin seluk, Reitór UNTL, Francisco Miguel Martins, hateten UNTL ho IPB estadu nian, tanba ne’e presiza serbisu hamutuk hodi garante kualidade ba estudante sira.

“Ida ne’e atu implementa peskiza konjunta, produsaun konjunta, diseminasaun konjunta, mobilidade akadémika ba profesór no estudante sira no depois utiliza fasilidade ne’ebé iha hosi parte rua nian. Ezemplu, laboratóriu para hasa’e kualidade akadémika,” katak nia.

Tuir Planu Estratéjiku Dezenvolvimentu Nasionál (PEDN) 2011-2030, iha Timor-Leste sei harii politékniku 3 no Akademia Peska ida. Tanba ne’e, kriasaun IPB hanesan implementasaun ba Planu Estratéjiku 2011-2030.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here