DILI, 24 juñu 2019 (TATOLI)Prezidente Institutu Politékniku Betano (IPB), Acácio Cardoso Amaral, hateten prosesu aprendizajen iha IPB la’o normál, maibé sala aula no ekipamentu laboratóriu la sufisiente.

“IPB infrenta problema oioin, liliu ekipamentu laboratóriu no sala aula. Hanesan instituisaun foun ita labele halo milagre iha tempu badak. Maibé, haree ba problema sira ne’e, ami la tuur nonook. Ami tenta para halo kooperasaun ho instituisaun relevante hanesan Sentru Formasaun Tibar ho Kámara Komérsiu Indústria Timor-Leste (CCITL-sigla portugés) atu responde ba difikuldade ne’e,” dehan nia ba Agência TATOLI, iha edifísiu Ministériu Ensiñu Superiór, Siénsia no Kultura (MESSK), Kolmera, Dili, ohin.

Ho problema hirak ne’e, Prezidente IPB ne’e sei halo kooperasaun mós ho UNTL nune’e fasilita estudante sira halo prátika iha sira-nia fatin.

Tuir nia, IPB iha sala aula sia (9), maibé balun uza ba administrasaun no dosente sira, tanba fatin la sufisiente. Estudante iha IPB hamutuk 414, dosente hamutuk 23—permanente na’in 10 resin, restu kontratadu.

“Ida ne’e mak ami-nia esforsu para rezolve problema ne’ebé iha, liliu problema ekipamentu no laboratóriu ne’ebé seidauk iha to’o agora,” Acácio informa.

Nia haktuir, Institutu Politékniku Betano, lansa iha 23 fevereiru 2017 no rekursu umanu iha momentu ne’ebá destakadu hotu no agora komesa iha ona staff permanente.

Prezidente IPB haklaken, presiza tau osan barak hodi sosa ekipamentu, nune’e fasilita di’ak liu-tan estudante sira.

“Presiza mellora di’ak liu-tan kurríkulu ne’ebé eziste—presiza halo renovasaun, tanba kurríkulu ne’ebé agora uza ne’e uluk komisaun instaladora mak halo tuir sira-nia kapasidade de’it no presiza halo formasaun ba dosente sira para hanorin di’ak liu-tan,” Acácio esplika.

Prezidente Institutu Politékniku Betano, esklarese jestaun ensiñu públiku ne’e tuir lei ezekusaun orsamentu jerál nian.

Maski IPB hasoru problema, maibé Oitavu Governu Konstitusionál kompromete ba setór ensiñu superiór atu bele hetan kbiit liu-tan no fundamentál tebes atu forma no prepara rekursu umanu, hodi bele asegura dezenvolvimentu nasionál.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here