DILI, 21 juñu 2019 (TATOLI)- Fundasaun ALOLA no Ha’u Hili Atu Kura (HALIKU) liuhusi Programa Saúde Inan no Oan, durante ne’e, fó hela asisténsia ba inan feton Timoroan na’in 115 ne’ebé sofre kankru stadium avansadu (3 no 4).

Lider Karizmátiku Kay Rala Xanana Gusmão, asina nia pintura ne’ebé nia fo lelaun hodi apoia fundu ba pasiente kankru serviks iha kalan angriasaun fundu ne’ebé hala’o iha Kinta (20/6/2019). Imajen/Eugénio Pereira

“Ho intervensaun HALIKU ita rejista maluk feto Timoroan hamutuk 115 maka agora hetan asisténsia saúde no hetan apoiu ba hasa’e konsisténsia prevensaun ba moras kankru.  Besik maluk feto 200 liu hatene ona informasaun kona-ba saida mak moras kankru serviks no oinsá atu halo prevensaun,” informa Diretora Funsaun ALOLA-HALIKU, Alzira Reis ba Ajénsia TATOLI iha EL-Legendario, Lecidere Dili, Kinta kalan (20/06/2019).

Alzira Reis esplika, ALOLA-HALIKU durante ne’e koopera tebes ho Ministériu Saúde liu-liu médiku no doutór sira iha Ospitál Nasionál Guido Valadares (HNGV-sigla portugés) hodi halo sosializasaun no kura moras kankru salva inan no oan sira.

Alzira hatutan, ba maluk feto Timoroan sira ne’ebé sofre moras, ALOLA-HALIKU  apoiu hala’o tratamentu saúde iha ospitál Dili no ba pasiente sira ne’ebé sofre moras kankru serviks avansadu bele ba hala’o tratamentu saúde iha rai li’ur.

“Maluk feto barak mak ami apoiu halo tratamentu saúde iha ospitál liuhusi sosa ai-moruk no buka deteta sira nia moras,” hateten Alzira.

Iha parte seluk, Alzira dehan, Fundadóra Funsaun ALOLA-HALIKU, Kirsty Sword Gusmão, mezmu iha rai li’ur maibé kontinua fó nafatin apoiu morál ba servisu HALIKU nian atu hakbesik liu ba feto sira iha área rurál ne’ebé durante ne’e barak sofre moras no la hatene informasaun.

Nia hatutan, HALIKU sei la’o too área rurál  hodi sosializa informasaun hodi hamenus númeru moras kankru nivel avansadu. Nune’e, HALIKU mós kontinua fahe informasaun ba komunidade sira iha área rurál kona-ba kauza no sintoma moras kankru feto liu –liu kankru susun no serviks.

HALIKU harii iha Marsu 2014 husi Fundadora Funsaun ALOLA, Kirsty Sword Gusmão  no Madre Lita Gomes no Isabel de Lima nu’udar sobrevivente ba moras kankru ne’ebé re-koopera  sira nia saúde.

HALIKU mós koopera ho Ministériu Saúde hodi halo misaun apoiu programa moras kankru ba feto no labarik.

HALIKU rasik sei hasoru obstákulu atu realiza programa sosializasaun no identifikasaun ba moras kankru ba feto sira seidauk másimu tanba falta rekursu umanu inklui finanseira.

Mezmu nune’e, HALIKU halo servisu sosializasaun uza mekanizmu fahe informasaun ba komunidade sira mak liuhusi atividade kampaña  sensibilizasaun iha feto sira liu husi fahe broxura no loke vídeo kona-ba ejeminasaun báziku moras kankru feto nia isin lolon.

Tuir dadus husi estatístika HNGV husi tinan 2015 to’o Abríl 2018, rejistu pasiente kankru susun hamutuk 210, husi númeru ne’e iha na’in 56 mak hetan operasaun no kontinua tratamentu too rekupera.

 Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here