Kontra atake entre jogadór Aitana FC no Kablaki FC iha Kampu Demokrasia. Imajen/Mídia LFA

DILI, 19 juñu 2019 (TATOLI)—Kablaki FC mehi hakarak hamriik nafatin iha Kablaki tutun, maibé Aitana FC tesi-tohar Kablaki tutun, FC Kablaki monu nakduir tuun ba rai naruk. Adeus Armada Ventura. Aitana liu lai.

Hanesan loron-matan, nunka rai-ódiu ba nakaras. Hato’o boa viajen bainhira tempu to’o rohan ona. Hanesan Kalblaki FC, maski lakon iha kompetisaun maibé ninia treinadór simu derrota ho fuan-boot no hato’o parabéns ba vitória-na’in.

Treinadór Kablaki FC, Romão Guterres, hateten lakon no manán nu’udar persepsaun hosi rezultadu ikus. Tan ne’e, nia simu derrota ho responsabilidade no ksolok.

“Ha’u hato’o parabéns ba Aitana tanba sira konsege manán ona ami hodi hakat ba Primeira Divizaun,” tenik Romão hafoin jogu ramata.

Aitana FC, maski ho jogadór nasionál de’it, konsege sasurut Kablaki ne’ebé sikat-leet jogadór estranjeiru (Papua-Indonézia) iha laran. Klube hosi rai Viqueque ne’e dere Armada Ventura ho 3-0 iha jogu kontinuasaun Segunda Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairru Formosa, Dili, ohin.

Vitória ne’ebé Aitana hetan, lori ekipa ne’e simu kedas billete Primeira Divizaun LFA époka 2020 ne’ebé sei hala’o iha tinan oin.

Hanesan manu aman be semo hasoru malu ho tara iha manu futu fatin, jogadór ekipa rua tuun iha kampu futeból la mamar ba malu. Ekipa rua kontra-atake ho enérjiku tebes. La sente kolen. Buka trunfu sé mak lais atu marka golu. Aitana nia tátika lais liu fali. Iha minutu 1 de’it, João de Jesus (8) lansa dadaun golu dahuluk hafoin aproveita bola barullu iha grandeia Kablaki. Aitana hahú ukun provizória Kablaki ho golu 1-0.

Treinadór Kablaki nia espresaun-oin baibain hela. La sente todan. Ba nia, foin golu ida, ne’e seidauk buat ida. Nia enkoraza ninia jogadór sira atu labele lakon esperansa. Luta ba nafatin. Lakon no manán kestaun tempu.

Hanesan bebida kratingdaeng ne’ebé halo ema sai enérjiku, treinadór nia motivasaun ne’e halo jogadór sira joga ho enérjiku liu-tan. Sira halo kontra-atake hale’u kampu ho iis be nakonu no uza tátika oioin atu bele marka golu.

Sira halo esfora-án mate maibé trunfu ida ne’e sei dook hosi sira-nia espetativa. Dala wa’in sira koko halo bombardeiamentu ba rede adversáriu maibé la biban marka golu. Soldadu (defeza) dalas ba dalas la fó fatin. La fó oportunidade.

Adversáriu, Aitana FC, seidauk satisfás ho golu ida ne’e. Tanba ne’e, aleinde halo defensivu, sira mós joga ofensiva atu marka tan golu. Liu de’it minutu 5, Aitana hamate dadaun soldadu Kablaki nia jogu. Hamate jogu no lori dadaun bola hodi lees guarda rede Kablaki. Golu ba daruak marka hosi jogadór Nélson Freitas (75) iha minutu 6, bainhira nia sobu defeza Kablaki ho velosidade depois husik xutu ne’ebé maka’as ba guarda rede Albino Pereira (1) no guarda rede ne’e hamriik metin hateke tuir de’it. Ain to’os atu hakat ba salva bola. Rezultadu muda ba 2-0.

Aitana…! Aitana…! O mak ain-tanan nia klube duni. Adeptu sira hakilar hodi apresia golu ne’ebé Aitana atinje. Entretantu, adeptu Kablaki lian hakmatek. Oin muroon. Fuan tuku-tuku. Lakon esperansa. To’o minutu 45, minutu deskansa nian, golu mantein 2-0.

Semo ba segunda parte, treinadór Kablaki, Romão Guterres, lansa estratéjia foun. Nia halo mudansa ba jogu. Nia lansa tékniku bola rai tanba bola rai maski neik maibé bele manipula adversáriu nia atensaun atu bele marka golu. Maibé, ne’e mós ladi’ak nafatin. Aitana sempre hamate avansadu Kablaki nia tátika tutuir.

Oportunidade barak ba Kablaki atu halo golu maibé Avansadu Pedro Borges (17), Richare Matul (10) no médiu Inoc Bidana (7), hetan impedementu hosi jogadór Aitana bainhira sira koko atu bombardeia guarda rede Fortunato Gomes (1).

Armada Ventura nia iis badak ba dadaun. Mehi atu hadau billete Primeira Divizaun hetok dook ba beibeik. Tanba, jogadór Kablaki serbisu maka’as atu bele manán jogu maibé la fásil ona. Hetan impedementu beibeik hosi adversáriu.

Sente dehan vitória iha liman sorin ona, Aitana joga ho kalma. La ansi hatama golu. Hein oportunidade hafoin halo golu. Iha minutu 81, médiu Miguel Araújo (9) pasa bola aas hosi kampu klaran monu loos ba avansadu Nélson Freitas (75) nia ain no nia (Nélson) la husik prezente ne’e soe estraga. Nia aproveita kedas bola ne’e hodi xutu ba rede Kablaki. Xutu la saugati leet. Antije duni golu. Tan ne’e, golu nakfilak sai 3-0.

Pruit… Pruit… Pruiiiiit! Árbitu lian dadaun ona. Tada katak jogu terminadu. Parabéns Aitana FC no parabéns mós ba Kablaki maski lakon.

Treinadór Aitana FC, Salvador da Silva orgullu no agradese ba estrutura Aitana no jogadór sira-nia esforsu mak ohin loron Aitana bele fila hikas ba Primeira Divizaun.

“Ha’u agradese tebes ba estrutura Aitana no jogadór Aitana sira hotu. Ami-nia esforsu ohin sai realidade,” tenik Salvador.

Maski hakat ona ba Primeira Divizaun maibé treinadór ne’e dehan la’ós fásil maibé sei iha todan barak mak sira hasoru iha jogu Primeira Divizaun. Ne’e duni, nia promete, sira sei serbisu maka’as liu-tan.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here