Prezidente Parlamentu Nasionál, Arão Noe de Jesus. Imajen/António Gonçalves

OE-CUSSE, 18 juñu 2019 (TATOLI)– Prezidente Parlamentu Nasionál (PPN), Arão Noe de Jesus Amaral, konsidera, Aeroportu Internasionál Oe-Cusse “Rota do Sândalo” exelente tanba Timor-Leste iha rejiaun Oe-Cusse hetan ona kampu aviasaun ho nivel internasionál.

“Aeroportu ne’e exelente tanba ita bele hetan ona kampu aviasaun ho nivel internasionál,” friza PPN Arão Noe de Jesus Amaral, ba Ajénsia TATOLI,ohin, hafoin partisipa iha serimónia  inaugurasaun Aeroportu Rota do Sândalo iha Rejiaun Administrativu Espesiál Oe-Cusse Ambeno (RAEOA).

“Maske, ohin, ita inaugura ona, maibé tenke hanoin agora, oinsá ita iha aviaun rasik tanba durante ne’e ita iha ona formandu ba aviasaun nian, tantu sivíl no militár.”

“Joven sira ne’ebé hetan ona formasaun pilotu bele halo vou atu kompleta oras vou, nune’e sira bele hetan asesu ba kontratu internasionál,” hateten Arão Noe de Jesus.

Arão Noe fó parabéns ba Prezidente Autoridade RAEOA, Mari Alkatiri ho nia mandatu tinan lima, ohin, bele konklui ho inaugurasaun aeroportu ho karater nivel internasionál.

“Ha’u fó parabéns ba Mari Alkatiri ho povu Oe-Cusse no povu Timor-Leste,” hateten Arão Noe de Jesus Amaral.

Prezidente Autoridade RAEOA, Mari Alkatiri nia mandatu termina iha 30 Jullu, tinan ne’e, nune’e PPN Arão Noe hateten, atu extende ka la’e, depende ba governu liuhosi desizaun Konsellu Ministru.

Se la extende, figura hanesan ne’ebé maka atu troka Mari Alkatiri, Arão Noe  hatán dehan, timoroan hotu iha direitu hanesan, kapasidade iha ka la’e, ida ne’e depende ba desizaun governu.

“Governu maka sei deside, se mak atu troka Mari Alkatiri hodi kontinua jere,” tenik Arão Noe.

Durante tinan lima (5) kriasaun RAEOA nian  iha buat haat importante ba dezenvolvimentu Oe-Cusse, mak hanesan Aeroportu, Estrada, Eletrisidade ho Irrigasaun Tono.

Jornalista        : Zezito Silva

Editór              : Francisco Simões

HAKEREK NO HATÁN

Please enter your comment!
Please enter your name here