Imblema AMP

DILI, 17 juñu 2019 (TATOLI) – Koligasaun Aliansa Mudansa ba Progresu (AMP) kompostu husi partidu CNRT, PLP no KHUNTO hala’o konferénsia nasionál ho tema “Konsolida AMP Hodi Serbí Di’ak Liu Povu”, husi loron 15 to’o 16 juñu, konsege hamosu Rezolusaun ida kompostu husi desizaun importante neen no hetan aprovasaun ho unanimidade husi konferensista sira iha loron ikus konferénsia.

Konferénsia ne’e rasik partisipa másimu husi kuadru partidu tolu hanesan membru diretivu nasionál koligasaun AMP, membru VIII Governu, membru V Lejislatura Parlamentu Nasionál, membru superiór partidu tolu, inklui membru bankada UDT/Frente Mudansa.

Liu-husi nota imprensa ne’ebé Ajénsia TATOLI asesu ohin (17/06), Pontu dahuluk husi desizaun ne’e, AMP kontinua tau fiar ba responsável AMP hanesan Kay Rala Xanana Gusmão nu’udar Prezidente AMP, Taur Matan Ruak nu’udar Portavós, José dos Santos Naimori Bucar nu’udar lider AMP ne’ebé durante ne’e tau matan ba lala’ok governasaun, no Konsellu Diretivu AMP atu koordena no fasilita nafatin komunikasaun entre Parlamentu Nasionál (PN) no Governu atu serbí povu di’ak liután.

Tuir mai, nafatin apoiu Kay Rala Xanana Gusmão iha prosesu dezenvolvimentu dada kadoras mai Timor-Leste, inklui dezenvolvimentu Tasi Mane.

Nune’e mós fó fiar ba Kay Rala Xanana Gusmão nu’udar negosiadór prinsipál ba negosiasaun fronteira terrestre no marítima ho Indonézia.

Alende ne’e, AMP admite estrutura VIII Governu Konstitusionál ne’ebé la-kompletu prejudika implementasaun programa VIII Governu no ezekusaun orsamentu.

“AMP reitera nia apoiu tomak ba membru VIII Governu indijitadu atu hetan pose, hodi halo kompleta VIII Governu atu serbí Estadu no nasaun ne’e tuir povu nia desizaun” refere komunikadu ne’e.

Tanba ne’e husu atu Primeiru-Ministru, Taur Matan Ruak halo nafatin komunikasaun ho Prezidente Repúblika (PR) hodi asegura tomada pose ba membru governu indijitadu.

“Husu ba Prezidente Repúblika justifika formalmente (por eskritu) nia pozisaun kona-ba membru polítiku indijitadu ne’ebé hetan mandatu husi aliansa vensedór iha eleisaun jerál antesipada 2018, ne’ebé prejudika mós integridade pesoál sira nian nu’udar sidadaun, tuir Konstituisaun RDTL,” sita tan nota imprensa ne’e.

Nune’e bainhira solusaun ba membru indijitadu, AMP sei la-halo diálogu ho kualker entidade no personalidade polítiku.

AMP liu-hosi rezolusaun ne’e rekomenda ba VIII Governu atu halo pagamentu ba dívida iha área infraestrutura inklui projetu 143 ne’ebé implementa ona, no mós dívida seluk tuir regra ne’ebé iha hodi labele impede dezenvolvimentu nasionál no kreximentu setór privadu.

Apoiu parseiru dezenvolvimentu tenke aliña ho Programa VIII Governu Konstitusionál no ba polítika ajuda externa Timor-Leste ho respeitu ba prinsípiu Country Owned, Country Lead no Use Country System (uza sistema nasaun).

Nune’e mós fó apoiu ba programa desentralizasaun, kontinua atendimentu ba veteranu, hadi’a profisionalizmu defeza no seguransa no kontinua dinamiza prosesu dezenvolvimentu, liu-liu iha área agrikultura, turizmu, komérsiu, indústria ho setór produtivu seluk hodi garante kreximentu ekonómiku no hamosu kampu traballu.

Enkuantu rekomendasaun ba Parlamentu Nasionál, hodi bele servisu hamutuk Governu hodi kontinua halo reforma ba setór justisa, hodi hakbiit autór justisa sira hodi hala’o sira nia kna’ar di’ak liután, atu garante justisa ne’ebé transparente, justu no ekilíbriu.

Ikus liu, AMP reitera nia pozisaun hodi kumpri kompromisu eleitorál 2018 kona-ba la-re-kondús mandatu Prezidente Rejiaun Administrativa Espesiál Oe-cusse Ambeno (RAEOA) ba mandatu foun, no husu Primeiru-Ministru hodi komunika desizaun ne’e ba Prezidente Repúblika.

Lee mós notísia: http://www.tatoli.tl/2019/06/maioria-konferensista-amp-deside-la-extende-mandatu-prezidente-raeoa/?fbclid=IwAR13N64tVqmt6O862W3hachlYVsGaHc3OzJwOHCxE3ZACtbvk4Jfn91A18c

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here