Foto hamutuk APFTL. Foto: APFTL

DILI, 17 juñu 2019 (TATOLI)-Alumni Parlamentu Foinsa’e Timor-Leste (APFTL) hamutuk ho Sekretáriu Estadu Joventude no Desportu (SEJD) ofisialmente lansa ba públiku hodi buka joven potensiál sira iha Timor-Leste (TL) hodi sai membru ba Parlamentu Foinsa’e (PF) ba périodu 2019-2022.

Sekretáriu Estadu Juventude no Desportu, Nélio Isaac Sarmento hateten, lansamentu ne’e hanesan preparasaun ba joven potensiál sira ne’ebé iha abilidade hanesan abilidade sívika sidadania nian atu ajuda haree kualidade umana, liliu preparasaun lideransa joven sira nian iha futuru.

“Sekretáriu estadu juventude desportu tinan ida ne’e atu tama ona époka dahaat ba kriasaun Parlamentu Foinsa’e, iha tinan primeiru to’o datolu iha ona joven hamutuk 300 resin nune’e ba périodu ida ne’e, ita koopera ho joven sira husi organizasaun Alumni Parlamentu Foinsa’e atu sira bele transforma fali koñesimentu ne’ebé sira iha ba joven sira ne’ebé ita atu halo selesaun ba,” informa Sekretáriu Estadu Nélio Isaac Sarmento iha Salaun São José Vila Verde, segunda (17/06).

Sei Iha Reprezentasaun Mós Husi Defisiente

Governante ne’e akresenta, selesaun ba Parlamentu Foinsa’e ba tinan ida ne’e hahú husi nível postu administrativu, mai munisípiu to’o nasionál no tinan ida ne’e reprezentasaun sei mai husi mós joven defisiente sira.

Nia mós hateten foinsa’e ne’e, grupu ne’ebé ita prepara joven sira ne’ebé iha abilidade sidadania atu sai hanesan lideransa iha futuru, signifika sai sidadaun ne’ebé maka respeita lei no orden síviku iha atividade saida de’it husi nasaun nian no respeita mós ita-nia identidade nu’udar timoroan.

“Tanba ne’e maka ita halo formasaun ho esperansa katak kuandu parlamentu (foinsa’e) ne’e ita organiza kada tinan, ita bele hetan ona númeru sufisiente, tanba labarik sira ne’ebé sai husi ne’e bele sai fali mentór ba hanorin joven sira iha área rurál. Ida ne’e maka ita-nia objetivu”.

Sekretáriu Estadu Nélio Isaac Sarmento, iha biban hanesan, hateten programa ne’e hanesan formasaun ba joven sira ho karakter, mentalidade ne’ebé diferente, katak tama iha Parlamentu Foinsa’e la’ós formasaun de’it maibé inspira sira oinsa hatene kona-ba respeitu ita-nia lei sira, sai sidadaun ne’ebé di’ak, partisipasaun iha prosesu dezenvolvimentu nian nune’e mós bele kontribui ajuda organizasaun seluk atu halo sensibilizasaun ruma kona-ba edukasaun sívika, saúde no seluk tan.

“Portantu atu hanorin sira-nia mentalidade hanesan estafeta foun iha aban bairua nian hodi kontribui ba ita-nia prosesu tomak no kontribui ba ita-nia estadu,” espera governante ne’e.

Governante ne’e informa tan katak programa formasaun ba tinan ida ne’e diferente ho tinan seluk; tinan kotuk foka liu ba edukasaun sívika sidadania maibé ba tinan ida ne’e foka liu ba emprendedorizmu; oinsá hanorin joven sira sai kreatividór ka kreatividora atu bele iha abilidade hodi loke kampu traballu ba sira-nia aan no ba joven seluk ne’ebé maka la iha kondisaun.

Enkuantu, Prezidente APFTL, Zaulino Gomes da Silva afirma, Parlamentu Foinsa’e hanesan espasu aprendizajen tanba ne’e oferese oportunidade ba joven sira ne’ebé mak iha interese atu kompete iha prosesu ida ne’e.

“Nia prosesu rekrutamentu ne’e, sira sei prienxe formuláriu, depois submete fali, ekipa pontu vokál nível postu administrativu sei verifika bazeia ba kritéria ne’ebé mak iha, hafoin anunsiu resultadu verifikasaun nune’e sira sei ba kampania, no eleisaun, sira maka sei vota ba malu,” informa Prezidente APFTL Zaulino Gomes perante profisionál komunikasaun sosiál sira.

Iha biban ne’e, prezidente APTL ne’e relata katak orsamentu ba programa ho totál hamutuk U$209.173.00 (rihun atus rua resin sia, atus ida hitunulu resin tolu) ne’ebé sei utiliza ba prosesu ne’e tomak; hahú husi prosesu primeiru to’o finál tomada de pose no eleisaun sei akontese iha loron 10 agustu iha nível teritóriu hotu.

Rekezitu Ba Prosesu Kompetisaun

  1. Idade tenke 12-17;
  2. Labele envolve iha partidu politíku;
  3. Seidauk forma família no tenke hela iha nível postu administrativu ne’ebé ema refere reprezenta ba;
  4. Feto ida, mane ida;
  5. Sidadaun timoroan;

Jornalista    : Nelia Rosario

Editór           : Rafy Belo

2 KOMENTÁRIU

HAKEREK NO HATÁN

Please enter your comment!
Please enter your name here