ATAÚRO, 14 juñu 2019 (TATOLI)—Komunidade Suku Beloi, Postu Administrativu Ataúro, Munisípiu Dili, la asesu rede telekomunikasaun hanesan Timor Telekom (TT), Telemor no Telkomcel.
“Ha’u-nia suku ne’e kompostu hosi Aldeia Adara, Atecru no Makér la asesu ba rede tolu ne’e (telekomunikasaun),” Xefe Suku Beloi, Adão da Costa Nunes ba Agência Tatoli iha Beloi, sesta (14/6).
Iha fatin hanesan, Xefe Aldeia Adara, João da Costa, informa foho boot barak hale’u sira, tan ne’e difísil asesu ba rede. “Ami hela loos iha kle’an, entaun ami iha ne’e rede tolu ne’e la asesu hotu. Ami kaer telemóvel mós saugati de’it tanba rede laiha. Kuandu dezastre boot ruma, ami atu informa ba xefe suku mós susar, ” nia haktuir.
Entretantu, Administradór Postu Administrativu Ataúro, Mateus Belo, reforsa katak rede tolu ne’e la’ós Suku Beloi mesak mak la asesu, maibé suku no aldeia seluk iha Ataúro mós la asesu hotu.
Jornalista: Evaristo Soares Martins
Editór: Xisto Freitas
