Diretór Klínika Bairru-Pité, dr. Daniel Murphy akompaña hosi Jestór Klínika Bairru-Pité, Inacio dos Santos, foin lalais ne'e, hasoru malu ho Prezidente Repúblika, Francisco Guterres Lú Olo, hodi hato'o sira nia susar kona-ba krize finanseira. Imajen/Media PR

DILI, 14 juñu 2019 (TATOLI)-Krize finanseiru ne’ebé enfrenta hosi Klínika Bairru-Pité, Dili, la’ós afeta de’it ba atendimentu no funsionamentu Klínika nian, maibé implika mós ba saláriu funsionáriu sira nian.

Funsionáriu na’in 93 hosi na’in 97 ne’ebé hala’o knar iha Klínika Bairru-Pité, ohin, ameasa sei halo asaun greve hodi ezije ba diretór klínika, dr. Daniel Murphy, atu bele konsidera sira nia direitu ba saláriu, ne’ebé fulan lima ona sira la simu.

Portavós atuál Enfermeiru Klínika Bairru-Pité, Marcelino Soares, hatete, maske kumpre ona devér hodi fó atendimentu ba povu liuhosi tratamentu saúde loron-loron, maibé to’o agora seidauk simu diretu ba saláriu durante fulan lima ona.

“Ami hasoru ona dezafiu boot durante ne’e  maske servisu maka’as hanesan professional saúde. Oinsá ho Governu nia hanoin kona-ba problema ida ne’e,” afirma Marcelino Soares, liuhosi konferénsia imprensa, ohin, iha Klínika Bairru-Pité.

Marcelino Soares ho nia kolega profisionál sira hato’o ona ba Diretór  Klínika, dr.  Daniel Murphy, katak, iha tempu badak mak la-responde sira nia direitu ba saláriu, sira sei mobiliza malu halo asaun greve iha klínika.

“Ami presiza ai-han, selu ami nia oan sira nia eskola, selu transporte hodi ba servisu, no ami balun mós aluga ema nia uma, maibé fulan lima ona seidauk selu ami nia direitu ba saláriu,” hatete Marcelino Soares.

Ho problema krize finanseira ne’e, governu liuhosi ministériu saúde presiza atu haree diretamente situasaun ne’e hodi rezolve tuir kontratu ne’ebé parte rua estabelese ona  antes ne’e, katak, kada fulan governu aloka rihun $50 hodi apoiu funsionamentu, maibé apoiu ne’e paradu durante fulan 5 ona.

“Ami funsionáriu no pasiente sira fiar nafatin ba Primeiru-Ministru, Taur Matan Ruak no lider karizmátiku Kay Rala Xanana Gusmão atu fó apoiu nafatin ba ezisténsia klínika Bairru-Pité,” tenik Marcelino Soares.

Hatán ba ameasa no protesta ne’e, Diretór Klínika Bairru-Pité, dr. Daniel Murphy,  hatete, ho krize finanseira ne’e sei afeta ba funsionamentu klínika atu fó tratamentu saúde ba pasiente sira, tanba ne’e, presiza tulun hosi  governu no doadór sira.

Kuaze tinan rua   resin ona maka klínika ne’e enfrenta problema orsamentu, tanba ne’e, Daniel Murphy informa atu funsionamentu la’o ho di’ak presiza $50.000 kada fulan hodi selu saláriu no alimentasaun ba pasiente sira ne’ebé baixa.

Nia fó hanoin ba governu atu tau mós verba orsamentu permanente iha Orsamentu Jerál Estadu (OJE) kada tinan, atu nune’e, bele tulun klínika ne’e hodi sai hosi krize finanseira durante ne’e.

Kada loron klínika ne’e atende pasiente ho moras oi-oin, 300-resin, maibé kapasidade finanseiru ho mínimu ekipamentu prejudika atendimentu ba pasiente sira.

Jestór Klínika Bairru-Pité, Inacio dos Santos hatete, iha funsionáriu hamutuk 97, na’in haat  (4) hetan pagamentu saláriu hosi Governu no 93 selu hosi Klínika ne’e ho padraun saláriu hosi $150 to’o $610.

“Ami  agora daudaun buka hela osan atu selu funsionáriu sira ho uitoan-uitoan atu nune’e atendimentu labele paradu,” hateten Inacio dos Santos.

Hosi total funsionáriu ne’e, kompostu hosi médiku na’in 9, parteira 10, enfermeiru no enfermeira 19 no restu servisu administrasaun, kondutór, cleaner,  finansas no seluk tan. Estimativa ba saláriu funsionáriu sira durante fulan lima la simu saláriu ne’e  presiza osan hamutuk $150.000.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here