Imajen hosi google.

DILI, 13 juñu 2019 (TATOLI) – Xefe Unidade Banku Raan Nasionál (BSN-sigla portugés), Gilberto Madeira, hateten kuaze semana rua ona BSN hasoru difikuldade tanba estoke raan menus, maibé ninia parte halo hela esforsu atu mantein estoke raan.

“Daudaun ne’e ami iha difikuldade uitoan kona-ba estoke raan, tanba estoke raan menus, maibé ohin ho aban ami sei halo atividade doasaun raan iha ospitál, hosi ne’e espera estoke raan sufisiente fali ona”, hateten Gilberto Madeira ba jornalista sira iha resintu BSN, ohin.

Xefe Unidade BSN ne’e hatutan: “Ospitál Nasionál Guido Valadares hanesan sentru, tan ne’e maioria pasiente sirkula hotu iha ne’e, entaun ida ne’e maka halo estoke ne’e menus hela de’it, karik maka iha ospitál referral sira nia banku de sangue bele la’o, entaun sira la to’o mai ospitál nasionál, más agora daudaun ne’e só ospitál nasionál mesak maka bele oferese raan”.

Gilberto Madeira dehan fulan tolu maka foin bele realiza atividade doasaun raan. “Pasiente ne’ebé presiza raan kada fulan ida besik 700, pasiente sira ne’e maioria baixa iha ospitál”, afirma Gilberto.

Tipu raan ne’ebé difisil tebes atu hetan maka tipu AB, no daudaun ne’e tipu raan menus maka A, no AB. “Tipu raan A daudaun iha BNS hamutuk pakote sia no pakote tolu hosi AB, ne’e ha’u bele dehan menus tebes, espera hosi atividade doasaun durante loron rua ne’e bele hetan barak liu iha tipu rua ne’e”, katak nia.

Entretantu, durante ne’e BSN ne’ebé koopera hodi doasaun raan maka mai hosi instituisaun governu hanesan prizaun Bekora, polísia, forsa, sira seluk no sosiedade sivíl.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here