Primeiru-Ministru, Taur Matan Ruak, konversa ho Diretór Ezekutivu Institutu Bambu I.P, Sabino Rua durante vizita ba institutu refere iha Tibar, kinta (13/06). Imajen Tatoli/Eugénio Pereira

TIBAR, 13 juñu 2019 (TATOLI)—Primeiru-Ministru (PM), Taur Matan Ruak dehan nia parte sei konsulta ho Ministériu Edukasaun atu sosa karteira hamutuk rihun 35 hosi Institutu Bambú Tibar I.P hodi fahe ba eskola sira ne’ebé sei menus kadeira no meza.  

PM Taur rekoñese kondisaun eskola hamutuk 1000 ne’ebé Ministériu Edukasaun halo dadaun sei falta kadeira, meza no biblioteka hodi fasilita mestre no mestra sira atu fahe matenek ba estudante sira bele uza tuir prosesu aprendizajen ho kondisaun di’ak.

“Ha’u presiza kadeira meza ba eskola, armari no meza ba profesór sira hamutuk rihun 35 fahe ba ita-nia eskola sira iha Timor-Leste,” haklaken PM Taur durante vizita no hala’o enkontru ho Diretór Ezekutivu Institutu Bambú I.P, Sabino Rua iha Tibar, Postu Administrativu Bazartete, Munisípiu Liquiçá, ohin.

Nia informa, bainhira kapasidade Institutu Bambú Tibar prodúz karteira barak ona, governu sei bandu liña ministériál sira atu sosa produtu hosi rai li’ur nian, maibé sosa de’it karteira Timor-Leste ho folin karun uituan maibé iha kualidade di’ak.

“Se imi-nia produsaun mak’as ona, ha’u atu bandu sira (membru governu) para labele sosa sasán hosi rai li’ur. Bainhira imi-nia kapasidade laiha ne’e susar. Entaun, ita tenki investe uluk hadi’a  imi-nia kondisaun di’ak mak ita sei sosa kadeira no meza,” tenik Taur.

Iha fatin hanesan, Diretór Ezekutivu Institutu Bambú I.P, Sabino Rua hateten nia parte agradese tanba Governu Timor-Leste iha nanoin hodi sosa karteira no produtu mobiliáriu sira seluk hosi Bambú Tibar.

Sabino hatutan, agora dadaun liña ministériál sira inklui instituisaun autónoma no organizasaun internasionál barak sosa ona produtu Bambú Tibar nian.

Foin lalais ne’e, nia haktuir, sira asina ona akordu kooperasaun ho Universidade Nacional Timor Lorasa’e (UNTL) hodi sosa kateira hamutuk rihun 10 ne’ebé agora hahú lori ona ba UNTL.

“Agora dadaun UNTL mak sosa ona kadeira no meza hamutuk rihun 10. Se governu hakarak sosa tan ba eskola, ita iha rekursu para prodúz kadeira no meza,” afirma Sabino ba PM Taur.

Nia esklarese, sira presiza liu mak governu atu investe ka sosa tan mákina ko’a au hodi aselera serbisu produsaun no aumenta rekursu iha sentru ne’e. Tanba, maski sira foin iha traballadór hamutuk 63 maibé iha kualifikadu ba área oioin ne’ebé prodúz ona sasán barak hodi fa’an.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here