Ministru Estadu Prezidénsia Konsellu Ministrus, Hermenegildo Augusto Cabral Pereira. Imajen Egas Cristovão

DILI, 12 juñu 2019 (TATOLI) – Governu liuhosi reuniaun Konsellu-ministru aprova kriasaun komisaun interministeriál ba dezenvolvimentu turizmu ne’ebé Governu rasik rekoñese hanesan pilar importante husi dezenvolvimentu ekonómiku, sosiál no ambientál Timor-Leste.

Ministru Estadu Prezidénsia Konsellu-Ministru Hermenegildo Augusto Cabral Pereira informa katak enkontru ohin ezekutivu sira diskute rezolusaun ida atu forma komisaun interministeriál ba setór turizmu.

“Ministériu Koordenadór Asuntu Ekonómiku no Ministériu Turizmu Komérsiu Indústria hahú servisu husi ekipa peritu sira husi banku mundiál, tanba ne’e presiza forma ekipa interministeriál hodi lidera prosesu dezenvolvimentu setór turizmu nian tuir programa VIII Governu Konstitusionál ne’ebé aprezenta iha Parlamentu Nasionál,” nia tenik ba jornalista sira iha Palásiu Governu, kuarta ne’e.

Governante ne’e mós dehan, iha ministériu ualu mak sei hola parte no deliberasaun ne’e, asina husi Primeiru-Ministru nu’udar despaxu ida ba kriasaun interministeriál ba turizmu hodi hahú halo planu mestre tuir polítika turizmu ne’ebé iha ona.

Kriasaun ba komisaun ne’e atu alkansa no haforsa mekanizmu koordenasaun  no kolaborasaun intersetoriál no interministeriál ho forma potensiál no kompetitividade husi nasaun enkuantu destinu iha área turizmu ne’ebé di’ak.

Komisaun ne’e lidera hosi Ministériu Koordenadór Asuntu Ekonómiku no ministériu sira iha área turizmu, ordenamentu territóriu, transporte no komunikasaun, kultura, ambiente, kooperativa no formasaun profisionál no empregu.

Ekipa interministeriál ne’e sei sai responsável ba promosaun elaborasaun planu turizmu no halo análiza ba inisiativa lejislativa ne’ebé presiza husi ministériu tutela.

Governu Nomeia Fransisco Kalbuadi

Iha biban hanesan, Governu liuhusi desizaun Konsellu-Ministru aprova mós despaxu husi Primeiru-Ministru nomeia Francisco Kalbuadi Lay nu’udar Autoridade Nasionál ba Espozisaun 2020 iha Dubai.

Hafoin sei konstitui no nomeia komisaun organizadora atu aprezenta Timor-Leste iha espozisaun ne’e, hanesan espozisaun mundiál ne’ebé sei realiza iha Dubai, Emiradu Árabe Unidu iha loron 20 outubru 2020 to’o loron 10 abríl 2021.

Konsellu-Ministru aprova mós Relatóriu Final husi Revizaun Nasionál Voluntária (VNR-sigla inglés) 2019 husi implementasaun Objetivu Dezenvolvimentu Sustentável (ODS), ho indikasaun ba implementasaun ajenda 2030 iha Timor-Leste.

Relatóriu ne’e sei sai hanesan kontribuisaun Timor-Leste ba Fórum Polítiku nível aas ne’ebé sei reúne iha fulan juñu iha sede Nasaun Unida, Nova Iorke, hodi hatudu rezultadu prosesu sira husi VNR.

Antes ne’e Governu Timór haruka ona mensajen save 11, ne’ebé hetan ona aprovasaun husi Konsellu-Ministru.

Relatóriu VNR dezenvolve bazeia husi prosesu konsultasaun ne’ebé lidera husi Grupu Traballu ODS, ne’ebé inklui reprezentante husi setór públiku, sosiedade sivíl, universidade, setór privadu, organizasaun relijioza no Parlamentu Nasionál.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here