Sekretáriu Estadu ba Asuntu Kombatente Libertasaun Nasionál, Gil da Costa Monteiro ‘Oan Soru’. Imajen Tatoli/Egas Cristóvão

DILI, 11 maiu 2019 (TATOLI)Sekretáriu Estadu ba Asuntu Kombatente Libertasaun Nasionál, Gil da Costa Monteiro  ‘Oan Soru’, hateten governu sei estabelese estrutura Konsellu Kombatente Libertasaun Nasionál iha  marsu 2020 hodi rezolve problema veteranu.

Estrutura ne’e sei estabelese iha  durante  kongresu nasionál ba kombatentes libertasaun nasionál ne’ebé sei hala’o iha 1-3 marsu 2020 hodi selebra mós Loron Nasionál Veteranu ne’ebé monu iha loron 3 marsu.

“Kongresu ne’e atu estabelese de’it  estrutura   tanba lei kona-ba Estatutu Konsellu Kombantente Libertasaun Nasionál  nian Prezidente Repúblika promulga ona,” dehan Gil ba jornalista-sira hafoin relata prosesu ne’e ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru-Pité, Dili, ohin.

Nia esplika, Komisaun Instaladora Konsellu ne’e forma ona Komisaun Munisipál iha munisípiu 12 inklui Rejiaun Administrativa Espesiál Oé-Cusse Ambeno  no ihajullu 2019, sei hala’o konferénsia munisipál iha teritóriu.

Governante ne’e informa katak estabelesementu Konsellu Kombatente Libertasaun Nasionál ne’e bazeia ba konstituisaun RDTL artigu 11 no Estatutu Kombatente Libertasaun Nasionál artigu 35  hodi fó valorizasaun ba ninia sidadaun ne’ebé fó ona kontribuisaun durante luta ba libertasaun nasionál.

Iha aliña dahuluk artigu 11 konstituisaun RDTL hateten Repúblika Demokrátika Timór-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi rai li’ur no mós ba sira hotu ne’ebé fó kontribuisaun hodi luta ba independénsia nasionál.

Daruak, Estadu rekoñese no valoriza Uma-Kreda Katólika nia partisipasaun iha prosesu ba libertasaun nasionál Timór-Leste nian.

Datoluk, Estadu asegura protesaun espesiál ba mutiladu funu nian, oan-ki’ak no mós sira seluk tan ne’ebé fó-án tomak ba luta independénsia no soberania nasionál nian, no proteje mós sira hotu ne’ebé partisipa ona iha rezisténsia hodi hasoru okupasaun hosi rai seluk tuir lei haruka.

No ikus, Lei maka define kona-ba mekanizmu atu fó omenajen ba asuwa’in nasionál sira. Entretantu, iha Estatutu Kombatente Libertasaun Nasionál artigu 35 hateten tenki hamosu Konselhu Nasionál Kombatente Libertasaun Nasionál ho objetivu atu fó valorizasaun ba veteranu sira.

 

Jornalista: Agapito dos Santos

Editór: Xisto Ffreitas

HAKEREK NO HATÁN

Please enter your comment!
Please enter your name here