Dadus totál prizioneiru sofre moras iha Komarka Becora.

DILI, 11 juñu 2019 (TATOLI)Durante janeiru-abríl 2019, Klinika  Kuidadu Saúde ba Ema Dadur iha Estabelesimentu Prizionál Becora, Dili, rejista prizioneiru hamutuk 180 mak sofre moras ispa.

Tuir dadus hatudu, dadur sira ne’e sofre moras tanba kondisaun sela komarka Becora ne’ebé kloot, la ijiene (hariis fatin iis) afeta ba dadur sira sira nia saúde.

Sentru Saúde ne’e mós rejista moras seluk hosi janeiru-abríl 2019 hanesan tensaun alta hamutuk ema na’in 55, dermatitis (kulit) 87, moras mentál 16, tuberkuloze (TBC) 3 no mate 1.

Antes ne’e, iha janeiru-dezembru  2018, rejista moras ispa hamutuk ema-na’in 120, tensaun alta 41, dermatitis (kulit) 30, moras mentál 15, tuberkuloze (TBC) 5, HIV/SIDA ida (1) no mate (1) ida.

Relasiona ho problema ne’e, Ministru Justisa interinu atuál Sekretáriu Estadu Terra Propriedade (SETP), Mário Ximenes rekoñese sei hadi’a kondisaun prizaun Becora nian hahú tinan 2020 ba oin.

Nia dehan, klínika ne’e harii hodi responde ba problema dadur sira sofre moras ruma bele hetan asisténsia saúde ho lalais, maibé tanba fatin kloot dalaruma halo sira sofre moras.

Ba dadaun ne’e, totál prizioneiru iha Becora hamutuk 614 kompostu hosi prizaun preventiva ema na’in 164 no prizaun kondenadu 450. Ho kondisaun komarka ne’ebé kloot dalaruma iha sela ida bele halibur ema to’o 60 hodi halo fatin la sufisiente.

“Tinan 2020, iha temátiku lima mak ita sei realiza. Entre lima ne’e, ida mak hadi’a dezenvolvimentu infraestrutura ne’ebé ita prevee ona orsamentu atu hadi’a prizaun Baucau, Aileu, Suai, Ermera no Oé-Cusse hodi halo espasu ne’ebé luan liu-tan,” dehan Mario ba jornalista iha Prizaun Becora, Dili, ohin.

Sekretáriu Estadu ne’e mós hateten, Prizaun Becora sei menus mós fasilidade hanesan toba fatin, kama, manta no sumasu tanba dalaruma prizioneiru balun toba de’it iha simente leten.

Tuir dekretu lei nú.14/2014 artigu 5, nia esplika, ko’alia kona-ba direitu prizioneiru nian bainhira tama komarka iha direitu atu asesu toba iha fatin ne’ebé dignu.

Bazeia ba observasaun Agência TATOLI I.P nota iha prizaun laran, prizineiru balun toba iha li’ur tanba kondisaun fatin kloot no rai manas.

Iha Fatin hanesan, Fundadór Centro Quesadhip Ruak Timor-Leste, Isabel Ferreira rekoñese kondisaun Komarka Becora kloot tebes hodi sulan dadur barak iha fatin ida.

“Ida ne’e sai hanesan problema ida ba ita, tanba númeru prizioneiru sira iha prizaun Becora hamutuk 614, Gleno 100 liu no Suai hamutuk 40. Ne’e númeru ida boot. Loloos, kapasidade prizaun Becora simu ema menus hosi ema na’in 300,” Isabel preokupa.

Nia husu ba Ministériu Justisa ba oin atu hadi’a kondisaun toba fatin Komarka Becora ka tenke loke luan tan nune’e prizioneiru sira toba ho di’ak hodi kumpri sira-nia pena prizaun to’o ramata.

“Ita haree iha sela ida bele hetan ema 70. Ne’e ladún di’ak. Maibé, ita labele dehan tratamentu la di’ak no la dignu, maibé tanba kondisaun. Tanba iha Timor-Leste prizioneiru sira loron ida han dala tolu ne’e buat di’ak ida,” Isabel hateten.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here