Ministra Finansa ein ezersísiu, Sara Lobo Brites. Imajen/Egas Cristovão

DILI, 5 juñu 2019 (TATOLI)-Ministra Finansa en ezersísiu, Sara Lobo Brites, informa Ministériu Finansa sei prosesa transferénsia orsamentu ba Rejiaun Administrativa Espesiál Oe-Cusse Ambeno (RAEOA) ho totál orsamentu millaun $76 iha tempu badak ho fazeadamente.

“RAEOA nian iha ona prosesu tanba akordu entre Primeiru-Ministru ho Prezidente RAEOA asina tiha ona iha fin fulan-maiu. Ami simu ona karta informasaun hosi gabinete, pur tantu, agora hela de’it ona Finansa prosesa transferénsia, ne’ebé iha tempu badak orsamentu ne’e sei transfere ba RAEOA,” informa atuál Vise-Ministra Finansas, Sara Lobo Brites, ohin, hafoin Reuniaun Konsellu Ministru.

Sobre transferénsia orsamentu 2019 ba RAEOA ho totál millaun $76 ne’e  fahe ba rua mak faze dahuluk sei halo transferénsia millaun $38 no daruak mós hanesan, maibé depende fali ba ezekusaun hosi RAEOA.

Sara Lobo Brites ko’alia sobre integrasaun ezekusaun orsamentu RAEOA ba Planeamentu Rekursu hosi Governu (GRP, sigla inglés) ne’e nia prosesu la’o hela.

“Depois orsamentu transfere ba RAEOA sei ezekuta nia osan, ita rekolla informasaun, ita sei tau iha Portál Transparénsia para públiku bele akompaña”.

Jornalista      : Maria Auxiliadora

Editór            : Francisco Simões

 

HAKEREK NO HATÁN

Please enter your comment!
Please enter your name here