[contact-form][contact-field label=”Name” type=”name” required=”true” /][contact-field label=”Email” type=”email” required=”true” /][contact-field label=”Website” type=”url” /][contact-field label=”Message” type=”textarea” /][/contact-form]

DILI, 04 juñu 2019 (TATOLI) – Ekipa Programa Nasionál Dezenvolvimentu Suku (PNDS) hasoru malu ho Primeiru-Ministru (PM), Taur Matan Ruak hodi informa implementasaun programa no alokasaun orsamentu dezde tinan 2013 to’o agora no ko’alia mós kona-ba revizaun matadalan.

Diretora PNDS, Dulce Guterres Junior haktuir katak Xefe Governu fó orientasaun no informasaun ruma atu bele muda matadalan tuir polítika PNDS tinan 2020.

“Iha 2020, sei iha revizaun matadalan ba PNDS tanba ne’e ohin oportunidade di’ak atu hasoru ho Primeiru-Ministru atu dehan katak karik ba-oin PNDS hakarak integra dezenvolvimentu rurál ne’ebé mak di’ak atu fó benifísiu ba komunidade sira. Entaun oinsá lala’ok no mekanizmu atu halo mudansa ba revizaun matadalan ne’e rasik atu implementa programa ho di’ak no bele fó benifísiu ba komunidade sira,” hateten  Diretora Dulce Guterres ba jornalista sira iha Palásiu Governu, tersa ne’e.

Tuir Diretora ne’e, PNDS implementa programa bazeia ba menu indikativu ne’ebé mak hakerek iha matadalan, liu-liu implementasaun programa infraestrutura bázika ne’ebé mak komunidade bele fásil implementa projetu sira ne’e, ho alokasaun orsamentu ba kada suku pur volta $40 mil to’o $60 mil.

“Tanba ne’e mak komunidade sira bele implementa programa infraestrutura bázika hanesan irigasaun, bee moos, estrada rurál, no mós oinsá mak komunidade sira bele uza osan para hadi’a mós sira-nia ekonomia iha suku laran,” katak ezekutiva PNDS.

Nia dehan, PM ko’alia liu oinsá mak projetu komunitáriu ne’e bele simples, lalais no ekonómikamente fó benifísiu ba komunidade sira, nune’e sira bele sente benifísiu husi osan ne’ebé governu aloka ona ba suku sira atu suku sira bele uza osan ne’e hodi hadi’a sira-nia ekonomia no hadi’a nesesidade bázika ne’ebé sira presiza.

Dulce akresenta, revizaun boot ne’ebé sei halo iha tinan oin mak oinsá mudansa ba programa ne’ebé durante ne’e Xefe Aldeia sira dehan iha implementasaun programa, sira sai hanesan penonton (espetadór).  “Entaun oinsá bele fó responsabilidade másimu ba suku sira atu sira sente sai na’in ba projetu ne’e rasik,” kompromete diretora ne’e.

Nia dehan, iha tinan 2019 ne’e governu sentrál aloka miliaun $9,7 ba PNDS no agora dadaun PNDS ezekuta ona pursentu 43 tanba osan sira ne’e hotu mai husi ministériu, ba Sekretariadu PNDS no transfere direta ba konta bankáriu kada suku.

Tuir Diretora ne’e, iha tinan 2019 PNDS kontinua nafatin ho matadalan ne’ebé iha ona, osan ne’ebé aloka ba projetu ho eskalaun ki’ik hanesan manutensaun estrada rurál, bee moos, irigasaun, manutensaun sala-aula no sala klínika (la-halo buat foun).

Nune’e mós tinan ne’e PNDS sei halo uma ba profesór sira no doutór sira tanba komunidade sira dehan hetan difikuldade kuandu profesór no doutór sira hela dook.

Nia haktuir, kada tinan PNDS sempre propoin miliaun $22 maibé durante ne’e alokasaun orsamentu la to’o tanba limitasaun orsamentu, nune’e programa suku tenke la’o fazeadamente, nune’e ekipa ne’e husu iha tinan 2020 bele iha posibilidade alokasaun orsamentu tuir saida mak propoin ona.

“Primeiru-Ministru dehan sei iha posibilidade tinan 2020 PNDS bele hetan miliaun $22, tanba iha tinan oin sei iha projetu barak ba suku sira, tanba ne’e Xefe Governu husu PNDS tenke prepara-an ba rekursu no fíziku atu serbisu iha implementasaun programa suku iha territóriu tomak,” tenik diretora.

Haktuir iha portál ofisiál PNDS, sekretariadu propoin iha tinan 2020 sei implementa projetu infraetrutura bázika hamutuk 995 ba suku 452 iha territóriu Timor tomak.

Totál projetu infraestrutura bázika hamutuk 955, husi Aileu iha 62 projetu, Ainaro 42, Baucau 118, Bobonaro 100, Covalima 60, Dili 99, Ermera 104, Lautem 68 , Liquisá 46, Manatutu 67, Manufahi 58, Oe-cuse 56, no Viqueque 75.

Jornalista: Julia Chatarina

Editór.      : Rafy Belo

HAKEREK NO HATÁN

Please enter your comment!
Please enter your name here