Ikan. Imajen/Google.

DILI, 4 juñu 2019 (TATOLI)-Timor-Leste seidauk konsege kombate peska ilegál iha tasi mane. Tuir dadus Diresaun Jerál Peska, Ministériu Agrikultura no Peska (MAP) nian hosi janeiru to’o dezembru 2018, hatudu katak, ró ilegál iha tasi mane iha unidade 107 no kálkulu rekursu (ikan) ne’ebé lakon tonelada 236.449 hodi konverte ba osan ho presu mínimu billaun $1.182.

Diretór Jerál Peska, Acácio Guterres, informa, Diresaun Jerál Peska sei investe iha ró rasik atu nune’e peskadór ka joven timoroan sira-nia prezensa iha tasi mane bele halo peska ilegál ne’e ta’uk no iha 2023 ró patrulla hosi Austrália unidade rua  sei halo monitorizasaun ba tasi Timór.

“Ita mós tenta nafatin halo esforsu para oinsá iha mós kompañia balu bele mai investe iha ne’e liuliu iha área peska, ita fasilita para ita-nia prezensa iha tasi laran ne’e pelumenus iha ne’ebá, sira hamenus peska ilegál no mós hatama reseita ba nasaun,” hateten Acácio  Guterres, ohin, iha Comoro,  Dili.

Antes ne’e, Governu Timor-Leste autoriza empreza Hong Long hosi Xina mak halo peska iha tasi mane ne’ebé hetan lisensa hosi novembru 2016 to’o novembru 2017, maibé suspende tiha iha 22 setembru 2017 tanba kazu hakail ikan tubaraun. Enkuantu, laiha prezensa ró ho bandeira Timór iha tasi mane maka fó espasu ba atividade peska ilegál aumenta.

Acácio salienta, daudaun ne’e iha proposta balun hosi empreza rua ka tolu hanesan ne’e ne’ebé hakarak investe iha tasi mane no Diresaun Jerál Peska  halo diskusaun kle’an ho empreza ida hosi Xina ne’ebé parseria ho timoroan no espera sira bele hatama ró mai para hakail ikan no mós halo vijilánsia iha tasi hodi diminui peska ilegál.

Nune’e parte tékniku peska nia sujere ba empreza ne’e atu halo tuir lei ne’ebé vigora no halo pedidu ba ministru para fó autorizasaun ró tama, hafoin ne’e mak haree ba nia lisensa.

Empreza hosi Xina ho parseria timoroan ne’ebé hakarak atu investe iha tasi mane ne’e iha ró unidade sanulu, maibé iha faze dahuluk ne’e sei hatama ró tolu depois maka hitu seluk  mai.

Jornalista      : Maria Auxiliadora

Editór             : Francisco Simões

HAKEREK NO HATÁN

Please enter your comment!
Please enter your name here