Ministru Reforma Lejizlativa no asuntu Parlamentar, Fidelis Manuel Leite Magalhães, Imajen/Egas Cristovão

DILI, 4 maiu 2019 (TATOLI)  Governu sentrál seidauk halo transferénsia orsamentu tinan fiskál 2019 nian ho montante millaun $76 ba konta Rejiaun Administrativu Espesiál Oe-Cusse Ambeno (RAEOA)-Zona Ekonomia Espesiál Sosiál Merkadu (ZEESM) tanba orsamentu tinan kotuk ho montante millaun $28 sei iha hela.

Ministru Reforma Lejizlativa no Asuntu Parlamentár, Fidelis Leite Magalhães,  esplika, RAEOA-ZEESM sei iha osan tinan kotuk nian ho montante millaun $28, tanba ne’e atu halo transferénsia presiza kumpre ezekusaun osan ne’ebé aprova hosi tinan kotuk.

“ZEESM la’ós iha ona saldu negativu, sei iha osan tinan kotuk nian ne’ebé kontinua ezekuta to’o agora,” esplika Ministru Fidelis  Magalhães, ba ajénsia TATOLI, ohin, iha Parlamentu Nasionál.

Ministru  Fidelis esplika, tuir regra sira ZEESM nian, bainhira atu transfere osan ba ne’ebá presiza iha ezekusaun osan ne’ebé atinje ona porsentu 50 hosi tinan kotuk nian.

“Protokolu transferénsia governu sentrál liuhosi Primeiru-Ministru halo ho autoridade. Atu transfere osan tenke tuir dalan ka kumpre rekizitu sira, hanesan osan ne’ebé fó ona antes ne’e tenke ezekuta antes transfere osan foun, ida ne’e maka lei orsamentu dehan kona-ba transferénsia,” esplika Fidelis Magalhães.

“Ami fiar katak iha tempu badak kuandu iha protokolu ezekusaun, ita sei finaliza prosesu ne’e. Buat ida klaru maka autoridade sei iha hela osan tinan kotuk nian.”

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here